స‌మీప భ‌విష్య‌త్తులో జీఎస్టీలో ఉన్న శ్లాబులు త‌గ్గే అవ‌కాశ‌మున్న‌ట్లు అరుణ్ జైట్లీ సూచ‌న‌లిచ్చారు. జులై 1 నుంచి అమ‌ల్లోకి వ‌చ్చిన జీఎస్టీకి సంబంధించి బుధ‌వారం, గురువారం జైట్లీ మాట్లాడారు. ఎక‌న‌మిస్ట్ అనే మ్యాగ‌జైన్ దేశ రాజ‌ధాని ఢిల్లీలో నిర్వ‌హించిన స‌మావేశంలో ఆర్థిక మంత్రి జైట్లీ పాల్గొని మాట్లాడారు. జీఎస్టీ అమ‌లు జ‌రిపే కొద్దీ వ‌చ్చే ప్ర‌యోజ‌నాల వ‌ల్ల కొన్ని రోజుల త‌ర్వాత ప‌న్ను రేట్ల‌ను ఎక్కువ లేకుండా కేవ‌లం 12%, 18% ఉండేలా చేసేందుకు జీఎస్టీ కౌన్సిల్ నిర్ణ‌యం తీసుకుంటుంద‌ని చెప్పారు. ద్ర‌వ్యోల్బ‌ణానికి సంబంధించి సైతం జీఎస్టీ సంబంధిత రాజ్యాంగ‌బ‌ద్ద‌మైన జీఎస్టీ కౌన్సిల్ త‌గు స‌మ‌యంలో నిర్ణ‌యం తీసుకుంటుంద‌ని ఆర్థిక మంత్రి అన్నారు.

"దేశంలో వినియోగ‌దారులు వివిధ ర‌కాల ఆదాయం వ‌ర్గాల వారీగా ఉన్నందున మ‌న దేశంలో జీఎస్టీ ప‌న్ను ఏక‌రీతిన విధించడం సాధ్యం కాదు. అందుకే జీఎస్టీ కౌన్సిల్ 4 ర‌కాల ప‌న్ను రేట్ల‌ను నిర్ణ‌యించింది. వివిధ వ్య‌క్తుల ఆదాయం వేర్వేరుగా ఉన్నందున రోజువారీ వాడే వ‌స్తువులు, విలాస‌వంత‌మైన కార్లు లాంటి వాటికి ఒకే ర‌క‌మైన ప‌న్ను విధించ‌డం సాధ్య‌ప‌డ‌దు." అని జైట్లీ ఈ సంద‌ర్భంగా వివ‌రించారు. జీఎస్టీ ప‌న్ను విధానం కార‌ణంగా ప్ర‌భుత్వ ఆదాయం పెరిగి సంక్షేమ ప‌థ‌కాల‌పై ప్ర‌భుత్వం చేసే ఖ‌ర్చు పెర‌గ‌గ‌ల‌ద‌ని జైట్లీ అభిప్రాప‌ప‌డ్డారు. జులై నెల‌కు సంబంధించి కేంద్రం, రాష్ట్ర ప్ర‌భుత్వాలు ల‌క్ష్యానికి మించి జీఎస్టీ వ‌సూళ్లు సాధించాయ‌ని ఆయన వెల్ల‌డించారు.