మ‌ధ్య స్థాయి, పెద్ద కార్లు, ఎస్‌యూవీల‌కు సంబంధించిన సెస్సును పెంచేందుకు కేంద్ర కేబినెట్ ఆమోదం తెలిపింది. ఇప్ప‌టివ‌ర‌కూ ఆయా కార్ల‌పై సెస్సు 15 శాతం దాకా ఉంది. దీన్ని 25 శాతం వ‌ర‌కూ పెంచేందుకు రంగం సిద్ద‌మైంది. ఈ ప్ర‌తిపాద‌న‌కు కేబినెట్ ఆమోదం తెలిపిన‌ట్లు కొన్ని వ‌ర్గాలు తెలిపాయి. ఎస్‌యూవీలు, మ‌ధ్య స్థాయి, పెద్ద కార్ల‌కు సంబంధించి జీఎస్టీ సుంకాన్ని పెంచేందుకు జీఎస్టీ కౌన్సిల్ ఆగ‌స్టు 5న ఆమోదం తెలిపింది. అయితే జీఎస్టీ చ‌ట్టం,2017 లో సెక్ష‌న్‌8ని స‌వ‌రిస్తేనే ఈ సుంకం పెంపుకు వీల‌వుతుంది.

జీఎస్టీ అమ‌ల్లోకి రాక‌ముందు మోటారు వాహ‌నాల‌పై ప‌న్ను 52-54.72 శాతానికి అద‌నంగా సెంట్ర‌ల్ సేల్స్ ట్యాక్స్‌, ఆక్ట్రాయ్ రూపంలో మ‌రో 2.5% ప‌న్ను అద‌నంగా విధించేవారు. జీఎస్టీ అమ‌లు త‌ర్వాత మొత్తం విధించే ప‌న్ను 43 శాతం వ‌ర‌కూ ఉంది. అయితే జీఎస్టీ అమ‌లుకు ముందు కార్ల‌పై ఎంత‌యితే ప‌న్నుందో ఆ స్థాయికి వెళ్లేందుకు సుంకాన్ని 15 శాతం నుంచి 25 శాతానికి పెంచాల్సి ఉంది. జీఎస్టీ వ‌ల్ల క‌లిగిన ప్ర‌యోజ‌నంతో చాలా ఎస్‌యూవీలు రూ.1.1 నుంచి 3 ల‌క్ష‌ల మ‌ధ్య రేట్ల‌ను తగ్గించాయి. ఇప్పుడు మ‌ళ్లీ సెస్ ప్ర‌భావంతో కార్ల ధ‌ర‌లు సాధార‌ణ స్థితికి వ‌చ్చే అవ‌కాశం ఉంది.