జీఎస్టీ కౌన్సిల్ త‌దుప‌రి స‌మావేశాన్ని హైద‌రాబాద్‌లో సెప్టెంబ‌రు 9న ఏర్పాటు చేయ‌నున్నారని తెలంగాణ ప్ర‌భుత్వంలో ఒక సీనియ‌ర్ అధికారి చెప్పారు. జీఎస్టీ అమ‌లు ప్రారంభించిన త‌ర్వాత జులై1, 21న రెండు స‌మావేశాలు నిర్వ‌హించగా ఇప్పుడు హైద‌రాబాద్‌లో జ‌రిగేది మూడోది. "ఈ స‌మావేశం హైద‌రాబాద్‌లో జ‌రుగుతుంది. దీనికి కేంద్ర ఆర్థిక మంత్రి అరుణ్ జైట్లీ నేతృత్వం వ‌హిస్తారు. ఏయే అంశాలు చ‌ర్చకు వ‌స్తాయ‌నే దాన్ని త్వ‌ర‌లో నిర్ణ‌యిస్తార‌"ని తెలంగాణ సీనియ‌ర్ అధికారి పీటీఐకి వెల్ల‌డించారు. ప్ర‌భుత్వ ప్రాజెక్టుల‌కు జీఎస్టీలో రాయితీ ఇవ్వ‌డం, బీడీ ప‌రిశ్ర‌మ‌, గ్రానైట్ వంటి వాటికి జీఎస్టీలో మిన‌హాయింపులు వంటి అంశాల‌ను తెలంగాణ ప్ర‌స్తావిస్తుంద‌ని ఆయ‌న చెప్పారు.

విత్త మంత్రి అరుణ్ జైట్లీ ఆధ్వ‌ర్యంలో ఆర్థిక మంత్రులంద‌రూ స‌భ్యులుగా గ‌త 10 నెల‌ల నుంచి జీఎస్టీలో ప‌లు అభ్యంత‌రాల‌పై చ‌ర్చించారు. ప‌లు స‌మ‌స్య‌ల‌ను కొలిక్కి తీసుకువ‌చ్చారు. ఆ విధంగా చివ‌ర‌కు స‌మ‌గ్ర‌మైన నాలుగు ర‌కాల ప‌న్నులు 5,12,18,28 శ్లాబుల‌ను తీసుకొచ్చారు. తెలంగాణ‌లో మొత్తం 2.16 వ్యాట్ చెల్లింపుదార్లు ఉండ‌గా ఇప్ప‌టి వర‌కూ దాదాపు 1.96 లక్ష‌ల మంది జీఎస్టీలో న‌మోదు చేసుకున్నారు. మిగిలిన వారు రూ. 20 ల‌క్ష‌ల కంటే త‌క్కువ ట‌ర్నోవ‌ర్ క‌లిగి ఉంటార‌ని భావిస్తున్నారు.