గ‌త కొన్ని నెల‌లుగా జరుగుతున్న ప‌రిణామాల‌తో ఇన్ఫోసిస్ సీఈవో ప‌ద‌వికి విశాల్ సిక్కా రాజీనామా చేశారు. దీంతో కంపెనీ వార్త అంద‌రికీ తెలిసిక కొద్ది గంట‌ల్లోనే కంపెనీ షేరు 12 శాతానికి పైగా న‌ష్ట‌పోయింది. 13 శాతం షేర్ ప‌డ్డ‌ప్పుడు కంపెనీ షేర్ విలువ 884.40 వ‌ర‌కూ వెళ్లింది. 3.02 గం.ల స‌మ‌యానికి 9.7% న‌ష్టంతో 99.15 రూపాయలు దిగ‌జారి 921.25 వ‌ద్ద ట్రేడ‌వుతున్న‌ది.

ఉదయం న‌ష్ట‌పోయిన దాని ప్ర‌కారం లెక్కిస్తే కంపెనీ వేల కోట్ల‌లో న‌ష్ట‌పోయింది. ఇన్వెస్ట‌ర్ల‌కు 13వేల కోట్ల న‌ష్టం వ‌చ్చింది. ఇన్ఫోసిస్ సీఈవో ప‌ద‌వి నుంచి విశాల్ సిక్కా త‌ప్పుకోవ‌డం చాలా మంది పెట్టుబ‌డిదారుల‌కు రుచించ‌లేదు. ఇదంతా ఇన్ఫోసిస్ వ్య‌వ‌స్థాప‌కులు నారాయ‌ణ మూర్తి త‌ప్పుడు ప్ర‌చారం వ‌ల్లే జ‌రిగింద‌ని కొంత మంది న‌మ్ముతున్నారు. మొత్తానికి ఇన్ఫోసిస్ షేర్ ప‌డిపోవ‌డంతో పెట్టుబ‌డిదారుల సంప‌ద తుడిచిపెట్టుకుపోయింది. గురువారం క్లోజింగ్ నాటికి ఉన్న రూ.2.34 ల‌క్ష‌ల కోట్ల నుంచి రూ.30 వేల కోట్లు త‌గ్గి రూ. 2.04 ల‌క్ష‌ల కోట్ల‌కు చేరింది. నారాయ‌ణ మూర్తి కుటుంబ స‌భ్యుల‌కు ఉన్న వాటాల ఆధారంగా చూస్తే ఆయా షేర్ల‌కు స‌మాన‌మైన సొమ్ము రూ.8068 కోట్ల నుంచి రూ.7040 కోట్ల‌కు త‌గ్గింది. అంటే దాదాపు నారాయ‌ణ మూర్తికి రూ.1000 కోట్లు న‌ష్టం.