మార్చితో ముగిసిన త్రైమాసికానికి ప్ర‌భుత్వ రంగ బ్యాంకుల‌కు ఉద్దేశ‌పూర్వ‌క ఎగ‌వేత‌దారులు బ‌కాయి ప‌డిన సొమ్ములో 20% వృద్ది క‌న‌బ‌డింది. దాదాపు 9వేల మంది క‌లిసి 92,000 కోట్ల మేర బ‌కాయి ప‌డ్డారు. మార్చి 2016లో ఈ ఉద్దేశ‌పూర్వ‌గ బ‌కాయిల సంఖ్య రూ.76,685 కోట్లుండ‌గా ఈ ఏడాది మార్చి నాటికి ఈ సంఖ్య రూ.92,376 కోట్ల‌కు పెరిగింది. దాదాపు 20.4% ఉద్దేశ‌పూర్వ‌క అప్పులు ఎక్కువ‌య్యాయి.

అదే స‌మ‌యంలో ఉద్దేశ‌పూర్వ‌క ఎగ‌వేత‌దార్ల సంఖ్య ఏడాది కాలంలో 10% పెరిగింది. ఆర్థిక మంత్రిత్వ శాఖ ప్ర‌కారం మార్చి,2016 స‌మ‌యానికి 8167 మంది ఉండ‌గా ఈ ఏడాది మార్చి నాటికి 8915కి పెరిగింది. ఈ మొత్తంలో 1914 కేసుల విష‌యంలో రూ.32,484 కోట్ల‌కు సంబంధించి ఎఫ్ఐఆర్ న‌మోద‌యింది. 2016-17 ఏడాది స‌మ‌యంలో 27 ప్ర‌భుత్వ రంగ బ్యాంకులు 81,683 కోట్ల రుణాల‌ను మాఫీ చేశాయి. గ‌త ఐదేళ్ల కాలంలో ఇదే అత్య‌ధికం. గ‌త ఆర్థిక సంవ‌త్స‌రం కంటే ఇది 41% అధికం.
కేవ‌లం ఎస్బీఐ, దాని అనుంబంధ బ్యాంకులు ఎన్‌పీఏల‌కు సంబంధించి రూ.27,574 కోట్ల‌ను ర‌ద్దు చేశాయని ఆర్‌బీఐ స‌మాచారం నుంచి తెలుస్తోంది. మొండి బ‌కాయిలు లేదా వ‌సూలు కాని రుణాలు ఏటేటా పెరుగుతూనే ఉన్నాయి. గ‌తేడాది ఈ సంఖ్య రూ.5.02 ల‌క్ష‌ల కోట్లుగా ఉండ‌గా ఈ ఏడాది మార్చి నాటికి 6.41 లక్ష‌ల కోట్ల స్థాయికి పెరిగింది.