సహారా లైఫ్ ఇన్సూరెన్స్ వ్యాపారాన్ని టేకోవర్ చేసుకోవాలంటూ ఐసిఐసిఐ ప్రుడెన్షియల్‌ను బీమా రంగ నియంత్ర‌ణ సంస్థ ఐఆర్‌డిఎఐ ఆదేశించడాన్ని సహారా గ్రూప్ సవాల్ చేయనుంది. దీనిపై తాము న్యాయస్థానాన్ని ఆశ్రయిస్తామని ఆదివారం సుబ్రతా రాయ్ నేతృత్వంలోని సహారా గ్రూప్ స్పష్టం చేసింది. ఐఆర్‌డిఎఐ నిర్ణయం దురదృష్టకరమని స‌ద‌రు సంస్థ‌ పేర్కొంది.

బీమా రంగ నిబంధనల ప్రకారం సహారా లైఫ్ నడవడం లేదని, దాని నిర్వహణ ప్రస్తుత పరిస్థితుల్లో సహారా గ్రూప్ చూసుకోలేదన్న అభిప్రాయానికి వచ్చిన ఐఆర్‌డిఎఐ.. ఐసిఐసిఐ ప్రుడెన్షియల్ ద్వారా వాల్యుయేషన్ రిపోర్టును తెప్పించుకుంది. ఈ క్రమంలోనే సహారా లైఫ్‌ను ఐసిఐసిఐకి అప్పగించాలని భావించగా, దీనిపై ఐఆర్‌డిఎఐ చైర్మన్‌ను సహారా గ్రూప్ అధినేత సుబ్రతా రాయ్ కలిశారు కూడా. అయినప్పటికీ ఫలితం లేకపోవడంతో చివరకు కోర్టుకు వెళ్లేందుకు సహారా సిద్ధమైంది. మరో ప్రైవేట్ రంగ బీమా సంస్థకు తమ సంస్థను అప్పగించడం సరికాదని మండిపడింది.