ఇప్పుడు రుణాలు అందుకోవ‌డం ఎంత తొంద‌రైతే అంత బాగా రుణ పుస్త‌క విలువ‌ను(లోన్ బుక్‌) బ్యాంకు పెంచుకోవ‌చ్చు. అందుకోస‌మే బ్యాంకులు ఒక‌దానితో ఒక‌టి పోటీ ప‌డుతుంటాయి. అదే దిశ‌లో ప్ర‌యివేటు బ్యాంకులు స‌రికొత్త‌గా ఆలోచిస్తుంటాయి. అదే కోవ‌లో ఐసీఐసీఐ బ్యాంకు వినూత్నంగా ఏటీఎం ద్వారా తక్షణమే రుణాలు అందించే సౌలభ్యాన్ని అందుబాటులోకి తెచ్చింది. అయితే ఇది ఎంపిక చేసిన తమ ఖాతాదారులకు మాత్రమేనని షరతు విధించింది. తమ బ్యాంకులో వేతన ఖాతాలు కలిగిన వారు తక్షణమే రూ.15 లక్షల వరకు రుణం పొందవచ్చని గురువారం ఆ బ్యాంకు పేర్కొంది.

లావాదేవీలను నగదురహిత, డిజిటల్‌గా మార్చడానికి ఈ త‌ర‌హా సేవ‌ను అందుబాటులోకి తెచ్చామని తెలిపింది. తక్షణమే ఖాతాదారులు వ్యక్తిగత రుణాలను పొందడానికి ఏటీఎంల ద్వారా రుణాలు అందించే సౌకర్యాన్ని తీసుకొచ్చామని ఐసీఐసీఐ బ్యాంకు ఎగ్జిక్యూటివ్‌ డైరెక్టర్‌ అనూప్‌ బాగ్చి పేర్కొన్నారు. తొలుత ఖాతాదారులకు తమకు అవసరమయ్యే ముందస్తు అనుమతి రుణ ఆఫర్‌ను ఎంచుకోవాలి. వారి అర్హతను బట్టి ఎటిఎం రుణ మొత్తాలను చూపిస్తుంది. రుణ విలువతో పాటు వడ్డీ రేటు, ప్రాసెసింగ్‌ ఫీజును, ఈఎంఐ మొత్తం తదితర నిబంధ నలను ఖాతాదారులు అంగీకరించాలి. ఈ ప్రక్రియ తర్వాత ఖాతాదారుల ఖాతాలో ఆ రుణ మొత్తాన్ని బ్యాంకు జమ చేస్తుంది. ఐదేళ్ల ఫిక్స్‌డ్‌ కాలవ్యవధిలో కస్టమర్లు రూ.15 లక్షల వరకు వ్యక్తిగత రుణాలు పొందడానికి వీలుందని వెల్లడించింది.