జులై 10 నుంచి గోల్డ్ బాండ్ల జారీ

ప్ర‌భుత్వ మ‌రోసారి సావ‌రిన్ గోల్డ్ బాండ్ల‌ను మ‌ళ్లీ జారీ చేయ‌నుంది. 2017-18 ఆర్థిక​ సంవత్సరంలో ఇదే తొలి గోల్డ్‌ బాం‍డ్ల ఇష్యూ. ఈ ఇష్యూకు దరఖాస్తులు జూలై10-14 తేదీల మధ్య స్వీకరిస్తామని, బాండ్లను జూలై 28న జారీచేస్తామని ఆర్‌బీఐ నోటిఫికేష‌న్‌ పేర్కొంది. ఒక గ్రాము బంగారానికి సమానంగా ఒక బాండు జారీఅవుతుంది. ఈ త‌ర‌హా బాండ్లలో కనీస పెట్టుబడి ఒక గ్రాము కాగా, ఒక ఆర్థిక సంవత్సరంలో గరిష్టంగా 500 గ్రాములకు సమానమైన బాండ్ల కొనుగోలుకు అనుమతిస్తారు.

8 సంవత్సరాల కాలపరిమితితో జారీచేసే ఈ బాండ్లపై 2.5 శాతం వార్షిక వడ్డీ లభిస్తుంది. బాండ్ల రూపంలో జారీ అయ్యే ఈ బంగారం పెట్టుబ‌డులు స్టాక్‌ మార్కెట్లో లిస్టవుతాయి. బాండ్లు జారీఅయ్యే ముందువారం ప‌సిడి సగటుధర ఆధారంగా బాండు ధరను నిర్ణయిస్తారు. బాండ్లను తనఖాపెట్టి రుణం కూడా తీసుకోవొచ్చు. 2015 నవంబర్‌లో ఈ స్కీమును ప్రారంభించిన తర్వాత ఇప్పటివరకూ 8 సార్లు ప‌సిడి బాండ్ల‌ను జారీ చేసి, రూ. 5,400 కోట్లు సమీకరించారు.