* ప్ర‌భుత్వం నుంచి ప‌ర్యావ‌ర‌ణ అనుమ‌తులు
కృష్ణా-గోదావరి (కెజి) బేసిన్‌లో షేల్ గ్యాస్, చమురు అన్వేష‌ణ కోసం ఐదు బావులను త‌వ్వ‌కునేందుకు ప్రభుత్వరంగ చమురు, సహజవాయువు అన్వేష‌ణ, ఉత్పాదక దిగ్గజం ఒఎన్‌జిసికి పర్యావరణ అనుమతులు లభించాయి. ఆంధ్రప్రదేశ్‌లో గల ఈ బేసిన్‌లో జరుగుతున్న ఈ తవ్వకాల అంచనా వ్యయం రూ. 217 కోట్లుగా ఉంది. గత 35 ఏళ్లకుపైగా ఇక్కడ ఓఎన్‌జీసీ గ్యాస్, చమురు ఉత్పత్తి చేస్తోంది. ఇదిలా ఉండ‌గా వచ్చే నెల 1 నుంచి దేశవ్యాప్తంగా అమల్లోకి రానున్న వస్తు, సేవల పన్ను (జిఎస్‌టి)లోకి సహజ వాయువును చేర్చే అవకాశాలు కనిపిస్తుండగా, ఇది ఓన్‌జీసీకి ప్రయోజనకరంగా మారుతుందనే అభిప్రాయాలు వ్యక్తమవుతున్నాయి.

ప్ర‌స్తుతం ఒక రోజుకు చ‌మురు వెలికితీత రోజుకు 750 నుంచి 800 ట‌న్నుల వ‌ర‌కూ జ‌రుగుతుండ‌గా; 2.5-3 మిలియ‌న్ క్యూబిక్ మీట‌ర్ల గ్యాస్ ఇక్క‌డ నుంచి ఉత్ప‌త్త‌వుతోంది. మొత్తం దేశ‌వ్యాప్తంగా చ‌మురు,స‌హ‌జ వాయు నిక్షేపాల ప‌రంగా కేజీ బేసిన్ కీల‌కం అయినందున పెట్రోలియం మంత్రిత్వ శాఖ సైతం ఇక్క‌డ వెలికితీత‌కు సంబంధించి ఆస‌క్తిగా ఉంది.