ప్రముఖ క్యాబ్‌ సర్వీసు సంస్థ ఉబర్‌ టెక్నాలజీస్‌ సహ వ్యవస్థాపకుడు ట్రావిస్‌ కలనిక్‌ తన సీఈవో పదవికి రాజీనామా చేశారు. ఉబెర్ కంపెనీ సీఈవో ట్రావిస్ కాలనిక్ తన పదవికి రాజీనామా చేశారు. రాజీనామా చేయాలంటూ ఉబర్ పెట్టుబ‌డిదార్ల నుంచి తీవ్రమైన ఒత్తిడి రావడంతోనే ఆయన ఈ నిర్ణయం తీసుకున్నట్లు సన్నిహిత వర్గాల సమాచారం. ప్రపంచంలోనే అతిపెద్ద స్టార్టప్ కంపెనీగా గుర్తింపు పొందిన ఉబెర్‌లో... పురుషాధిపత్య సంస్కృతి కొనసాగుతున్నట్టు ఆరోపణలు వచ్చాయి. మహిళా సిబ్బందిపై లైంగిక వేధింపులు పెరుగుతున్నాయంటూ ఫిర్యాదులు వెల్లువెత్తాయి. దీనికి తోడు వారం క్రితమే ట్రావిస్ తల్లి బోటింగ్ చేస్తూ అకాల మరణం చెందారు.

దీంతో ఆయన నిరవధికంగా సెలవు పెట్టాలని భావించారు. అయితే కంపెనీలోని ప్రధాన వాటాదారులు ఆయన రాజీనామా చేయాల్సిందేనని పట్టుబట్టారు. 'మూవింగ్ ఉబెర్ ఫార్వార్డ్' పేరితో లేఖ రాస్తూ... ట్రావిస్ వెంటనే రాజీనామా చేయాలనీ, నాయకత్వాన్ని మార్చాలని డిమాండ్ చేశారు. దీంతో చేసేదేమీలేక మెట్టుదిగిన ఆయన... పెట్టుబ‌డి పెట్టిన వారి కోరిక మేరకు కంపెనీ సారథ్య బాధ్యతల నుంచి తప్పుకుంటున్నట్టు ప్రకటించారు. అయితే ట్రావిస్ ఇకపై సంస్థ బోర్డులో సభ్యుడిగా మాత్రం కొనసాగే అవ‌కాశం ఉంది.