కేసుల‌తో స‌త‌మ‌త‌మ‌వుతున్న స‌హారా గ్రూప్ విష‌యంలో ఇబ్బందుల‌తో ఆ గ్రూప్ సంస్థ‌కు సంబంధించి ఐఆర్‌డీఏఐ ఒక నిర్ణ‌యం తీసుకుంది. దేశంలో బీమా రంగ నియంత్ర‌ణ సంస్థ‌ ఐఆర్‌డీఏఐ.. సహారా ఇండియా లైఫ్ ఇన్సూరెన్స్ సంస్థ నిర్వహణను తన చేతిలోకి తీసుకుంది. సహారా గ్రూపు అధినేత సుబ్రతారాయ్‌కి చెందిన ఈ కంపెనీ.. పాలసీదారుల ప్రయోజనాలకు హాని చేసే విధంగా వ్యవహరిస్తున్నదని ఐఆర్‌డీఏఐ పేర్కొంది.

సంస్థ రోజువారీ వ్యవహారాలను పర్యవేక్షించేందుకు జనరల్ మేనేజర్ ఆర్‌కే శర్మను పరిపాలన అధికారిగా నియమించిన‌ట్లు ప్ర‌క‌టించింది. ఈ నియామకం తక్షణమే అమలులోకి వస్తుందని నియంత్రణ మండలి తెలిపింది. పరిపాలన అధికారి సంస్థ వ్యాపారాన్ని ఇన్సూరెన్స్ చట్టం-1938 నిబంధనలకు అనుగుణంగా నిర్వహిస్తారని సోమవారం విడుదల చేసిన స్టేట్‌మెంట్‌లో పేర్కొంది. ప్రస్తుత ఆర్థిక సంవత్సరంలో (2017-18) గడిచిన రెండునెలల కాలంలో సహారా లైఫ్ రూ.1.53 కోట్ల విలువ చేసే 665 పాలసీలను విక్రయించింది. గత ఆర్థిక సంవత్సరంలో సంస్థ 16,058 కస్టమర్ల నుంచి రూ.44.68 కోట్ల ప్రీమియం వసూలు చేసింది.