* రూ.75 ల‌క్ష‌ల పైబ‌డి ఉండే రుణాల‌కు ఎస్‌బీఐ వ‌డ్డీ రేట్ల త‌గ్గింపు
అధిక విలువ క‌లిగిన గృహ రుణదారుల‌కు ఎస్‌బీఐ తీపి క‌బురందించింది. స్టేట్‌ బ్యాంక్‌ ఆఫ్‌ ఇండియాకు సంబంధించి 75 లక్షల రూపాయలకు మించిన గృహ రుణంపై వడ్డీ రేటును 0.10 శాతం మేర తగ్గించింది. జూన్‌ 15వ తేదీ నుంచి తగ్గించిన వడ్డీ రేటు అమల్లోకి వస్తుంది. ఉద్యోగం చేస్తున్న‌మహిళలు తీసుకునే రుణంపై కొత్త వడ్డీ రేటు 8.55 శాతంగా ఉంటుంది. ఇతరులకు 8.60 శాతం వడ్డీ రేటు వర్తిస్తుంది.

ఇటీవలి స‌మీక్షలో గృహ రుణాలపై రిస్క్‌ వెయిటేజీని ఆర్‌బీఐ తగ్గించింది. ఈ నేపథ్యంలో ఆ మేరకు కలిగే ప్రయోజనాన్ని కస్టమర్లకు ఇవ్వాలని నిర్ణయించినట్టు ఎస్‌బిఐ మేనేజింగ్‌ డైరెక్టర్‌ (నేషనల్‌ బ్యాంకింగ్‌) రజనీష్‌ కుమార్‌ తెలిపారు. 75 లక్షల రూపాయలకు మించిన గృహ రుణంపై రిస్క్‌ వెయిటేజీని ఆర్‌బిఐ 75 శాతం నుంచి 50 శాతానికి తగ్గించింది. అంతేకాకుండా గృహ రుణంపై స్టాండర్డ్‌ అసెట్‌ ప్రొవిజన్స్‌ను 0.40 శాతం నుంచి 0.25 శాతానికి తగ్గించింది. ఈ నేపథ్యంలోనే ఎస్‌బీఐ 75 లక్షల రూపాయలకు మించిన గృహ రుణంపై వడ్డీ రేటును తగ్గించింది. గత ఏప్రిల్‌లో ఎస్‌బిఐ గృహ రుణాలపై వడ్డీ రేట్లను 0.25 శాతం మేర తగ్గించిన విషయం తెలిసిందే.