ద్వైమాసిక ద్రవ్యపరపతి సమీక్షా సమావేశం ఆర్‌బిఐ ఈ సారి రెపోరేట్లను యథతాధంగా కొనసాగించాలని నిర్ణయించింది. ఈ ద‌ఫా సమీక్షా సమావేశంలో ఆర్‌బిఐ కొన్ని కీలకాంశాలపై అభిప్రాయాలను వెలువరించింది. జిఎస్‌టీ అమలుతో ద్రవ్యోల్బణం పెరుగుతుందన‍్న భయాలను ఆర్‌బిఐ తోసిపుచ్చింది. ద్రవ్యోల్బణంపై జిఎస్‌టీ ఎలాంటి ప్రభావం చూపదని అభిప్రాయపడింది.

ఈ ఏడాది తొలి అర్ధభాగంలో ద్రవ్యోల్బణం 2- 3.5 శాతం, మలి సగం 3.5- 4.5 శాతం మధ్య ఉంటుందని అంచనా వేసింది. ప్రధాన వస్తు సేవలన్నింటినీ నాలుగురకాల పన్ను శ్లాబుల్లో వర్గీకరిస్తూ ప్రభుత్వం వ‌స్తు,సేవ‌ల ప‌న్నును అమల్లోకి తీసుకురానుంది.
ఈ ఆర్థిక సంవత్సరం జివిఎ వృద్ధిపై గత ఏప్రిల్‌లో ఇచ్చిన అంచనాలను ఆర్‌బిఐ 10 బేసిస్‌ పాయింట్ల మేర తగ్గించి 7.3 శాతంగా ప్రకటించింది.
అంతర్జాతీయ భౌగోళిక రాజకీయ కారణాలు వృద్ధి బాటలో అవరోధం కావచ్చని రిజ‌ర్వ్ బ్యాంక్‌ హెచ్చరించింది. ఉత్పాదకాల ధరలు పెరగడం, వేతన వ్యయాల నిర్వ‌హ‌ణ వంటివి కంపెనీల లాభాలపై ‍వ్యతిరేక ప్రభావం చూపవచ్చని తద్వారా జివిఎ వృద్ధి కుంటుబడవచ్చని విశ్లేషించింది. భారీ రుణభారం ఉన్న కంపెనీలు- నిరర్ధక ఆస్తుల ఒత్తిడితో స‌త‌మ‌త‌మ‌వుతున్న‌ బ్యాంకులు కలిసి ప్రైవేట్‌ పెట్టుబడులు డిమాండ్‌ పెరగకుండా చేస్తాయ‌ని పేర్కొంది.