ఒక ప‌క్క నిర్వ‌హ‌ణ‌కు తంటాలు ప‌డుతున్న స్నాప్‌డీల్‌కు సాంత్వ‌న చేకూర్చే విష‌యం ఇది. ఫ్లిప్‌కార్ట్‌, అమెజాన్‌ల నుంచి గ‌ట్టి పోటీ నేప‌థ్యంలో ఒక ద‌శలో సంస్థ‌ను అమ్మేయ‌డానికి సిద్ద‌మైన స్నాప్‌డీల్‌కు మ‌రో రౌండ్ నిధులు స‌మ‌కూరాయి. ప్ర‌స్తుత ఇన్వెస్ట‌ర్ నెక్స‌స్ వెంచ‌ర్ పార్ట‌న‌ర్స్‌, కంపెనీ వ్య‌వ‌స్థాప‌కుల నుంచి దాదాపు రూ.113 కోట్ల మేర నిధులు వ‌చ్చాయ‌ని స‌మాచారం. అయితే తాజా నిధుల కార‌ణంగా ఫ్లిప్‌కార్ట్‌లో విలీనం విష‌యం ప‌క్క దారి ప‌ట్ట‌క‌పోవ‌చ్చ‌ని పేరు వెల్ల‌డించడానికి ఇష్ట‌ప‌డని కంపెనీ ప్ర‌తినిధి ఒక‌రు వెల్ల‌డించారు.

స్నాప్‌డీల్‌లో సింహ భాగం పెట్టుబ‌డుల‌ను జ‌పాన్‌కు చెందిన సాఫ్ట్‌బ్యాంక్ క‌లిగి ఉంది. దేశీయ ఈ-కామర్స్ రంగంలో తగిన పోటీని ఇవ్వ‌లేని క్ర‌మంలో, ఆశించిన లాభాలు రాక‌పోవ‌డంతో స్నాప్‌డీల్‌ను దేశ ఈ-కామర్స్ సంస్థ ఫ్లిప్‌కార్ట్ చేజిక్కించుకునే అవ‌కాశం ఉంద‌ని ప్ర‌చారం జ‌రుగుతున్న‌ది. దీనికి సంబంధించి స్నాప్‌డీల్ పెట్టుబ‌డిదార్ల మ‌ధ్య బోర్డు స‌మావేశం జ‌రిగింద‌ని తెలుస్తోంది.