ప్ర‌యోగాత్మ‌కంగా ప్రారంభం

ఫైబ‌ర్ టు ద హోమ్ పేరిట జియో త‌న ప్ర‌స్థానాన్ని ప్రారంభించ‌నున్న‌ట్లు టెలికాం వ‌ర్గాల్లో ప్ర‌చారం జ‌రుగుతోంది. ఈ క్రమంలో ఇప్పటికే జియో తన బ్రాడ్‌బ్యాండ్ ఇంటర్నెట్ సేవలను ముంబై, పూణెలలో ప్రయోగాత్మకంగా పరిశీలిస్తోంది. కొంతమంది యూజర్లకు ఇప్పటికే ఉచితంగా ఈ సేవలను జియో అందిస్తున్నట్లు సమాచారం. ఈ క్రమంలో వారు తమకు జియో బ్రాడ్‌బ్యాండ్ ద్వారా వస్తున్న ఇంటర్నెట్ వేగం వివరాలను సోషల్ మీడియాలో షేర్ చేయగా, అవి వైరల్ అయ్యాయి. అయితే జియో బ్రాడ్‌బ్యాండ్ సేవలు అధికారికంగా ఎప్పుడు ప్రారంభం అవుతాయనేది మాత్రం తెలియడం లేదు. దీనిపై త్వరలోనే జియో ఒక ప్రకటన చేసే అవకాశముంది.

మొదటి 3 నెలలు ఫ్రీ...

జియో తన జియో ఫైబర్ బ్రాడ్‌బ్యాండ్ ఇంటర్నెట్‌ను మొదటి మూడు నెలల పాటు యూజర్లకు ఉచితంగా అందివ్వనుంది. ఆ సమయంలో యూజర్లు గరిష్టంగా 100 ఎంబీపీఎస్ స్పీడ్‌ను పొందవచ్చు. అన్‌లిమిటెడ్ ఇంటర్నెట్ డేటాను ఉపయోగించుకోవచ్చు. ఆ తరువాత రూ.500, రూ.2వేల ప్లాన్లు రెండింటిని ముందుగా ప్రవేశపెట్టనున్నారు. రూ.500 ప్లాన్‌తో 600 జీబీ డేటా ఉచితంగా వస్తుంది. రూ.2వేల ప్లాన్‌తో 1000 జీబీ డేటా వస్తుంది. ఈ రెండు ప్లాన్లలోనూ యూజర్లు గరిష్టంగా 100 ఎంబీపీఎస్ స్పీడ్‌తో నెట్‌ను బ్రౌజింగ్ చేసుకోవచ్చు. అయితే నిర్దేశించిన డేటా లిమిట్ పూర్తయితే డేటా వేగం తగ్గుతుంది. ఇన్‌స్టాలేష‌న్‌, రూట‌ర్ కోసం దాదాపు రూ.4500 వ‌ర‌కూ

వ‌సూలు చేసిన‌ట్లు సోష‌ల్ మీడియాలో ప్ర‌చారం జ‌రుగుతోంది.

100 ఎంబీపీఎస్ స్పీడ్ ఉంటే...

జియో ఫైబర్ అందించనున్న 100 ఎంబీపీఎస్ ఇంటర్నెట్ స్పీడ్‌తో 5జీబీ సైజ్ గల హెచ్‌డీ సినిమాను కేవలం 6 నిమిషాల్లోనే డౌన్‌లోడ్ చేసుకునేందుకు వీలుంటుంది. అదేవిధంగా 5 ఎంబీ సైజ్ గల 100 పాటలను కేవలం 24 సెకన్లలోనే డౌన్‌లోడ్ చేసుకోవచ్చు. అంతటి వేగాన్ని జియో ఫైబర్ ఇవ్వనుంది. ఇప్పటికే ఎయిర్‌టెల్, యాక్ట్, హాత్‌వే వంటి ప్రముఖ సంస్థలతోపాటు బీఎస్‌ఎన్‌ఎల్ కూడా బ్రాడ్‌బ్యాండ్ సేవలను వినియోగదారులకు అందిస్తున్నాయి. ఇక జియో ఫైబర్ వస్తే ఈ సంస్థలు ఎలాంటి ఆఫర్లను ఇస్తాయో వేచి చూడాలి.

జియో రూట‌ర్ సైతం ప్ర‌త్యేకం

సాధార‌ణంగా వైఫై క‌నెక్ష‌న్ తీసుకునే వారు ఎక్కువ‌గా ఆలోచించేది రూట‌ర్ ద‌గ్గ‌రే. ఈ విష‌యంలో క‌స్ట‌మ‌ర్ల‌ను ఆక‌ట్టుకునేందుకు త‌క్కువ ధ‌ర‌లోనే రూట‌ర్‌ను తీసుకొచ్చే యోచ‌న‌లో జియో ఉన్న‌ట్లు స‌మాచారం. మ‌ధ్య త‌ర‌గ‌తి వారికి అందుబాటులో ఉండే రీఫండ‌బుల్ డిపాజిట్‌తో ప్ర‌తి యూజ‌ర్‌కు వైఫై రూట‌ర్‌ను అందించేందుకు ప్ర‌య‌త్నాలు జ‌రుగుతున్నాయి. ఇప్ప‌టికే ఈ క్ర‌మంలో ఏ ఇత‌ర కంపెనీ రూట‌ర్ వెన‌క్కు ఇచ్చినా జియో రూట‌ర్ ఉచితం అని రిల‌య‌న్స్ జియో ప్ర‌క‌టించిన సంగ‌తి తెలిసిందే.

అమెరికాలో అలా... భార‌త్‌లో ఇలా...

అభివృద్ది చెందిన అమెరికా వంటి దేశాల్లో ప్ర‌జ‌లు బ్రాడ్‌బ్యాండ్ త‌ప్ప‌నిస‌రి అవ‌స‌రంగా భావించే ప‌రిస్థితి ఉంది. అయితే భార‌త్‌లో ఇది భిన్నంగా ఉంద‌నే చెప్పుకోవాలి. అవ‌స‌ర‌మైతే త‌ప్ప బ్రాడ్‌బ్యాండ్ క‌నెక్ష‌న్‌ను తీసుకునేందుకు చాలా మంది అంత‌ర్జాల వినియోగ‌దార్లు సిద్దంగా లేరు. ఇందుకు ప్ర‌ధాన కార‌ణం బ్రాడ్‌బ్యాండ్ ధ‌ర‌లు ఎక్కువ ఉండ‌టం. దేశంలో 20 కోట్ల మంది మాత్ర‌మే బ్రాడ్‌బ్యాండ్‌ను వాడుతున్నారంటే ప‌రిస్థితి ఎలా ఉందో అర్థం చేసుకోవ‌చ్చు. అయితే డేటా విప‌రీత‌మైన వేగంతో అందించ‌డంతో పాటు అందుబాటు ధ‌ర‌ల్లో బ్రాడ్‌బ్యాండ్ విస్త‌ర‌ణ‌కు పావులు క‌దుపుతుండ‌టంతో ఇంటింటా బ్రాడ్‌బ్యాండ్ విస్త‌రిస్తుందో లేదో వేచి చూడాలి.