* సోలార్ ప‌రిక‌రాల‌పై జీఎస్టీ తగ్గింపు
సౌర విద్యుత్ ప‌రికరాలు, ప్యాన‌ల్స్‌, విడి భాగాల‌కు 5 శాతం జీఎస్టీ మాత్ర‌మే వ‌ర్తిస్తుంద‌ని కేంద్ర‌ రెవెన్యూ శాఖ కార్య‌ద‌ర్శి హ‌స్ముఖ్ అథియా వెల్ల‌డించారు. జీఎస్టీ కౌన్సిల్ సమావేశం సంద‌ర్భంగా ఇంత‌కుముందు 18 శాతం ప‌న్ను రేటును నిర్ణ‌యించిన సంగ‌తి తెలిసిందే. ఆర్థిక శాఖా మంత్రి అరుణ్ జైట్లీ, వివిధ రాష్ట్ర ప్ర‌భుత్వాల‌కు చెందిన ఆర్థిక మంత్రులు స‌భ్యులుగా ఉన్న జీఎస్టీ కౌన్సిల్ ఆ నిర్ణ‌యాన్ని పునః ప‌రిశీలిస్తుంద‌ని సీనియ‌ర్ అధికారులు తెలిపారు.

ప‌న్ను రేటు విష‌య‌మై ప‌రిశ్ర‌మ ప్ర‌తినిధులు ట్విట్ట‌ర్ ద్వారా అడిగిన ప్ర‌శ్న‌ల‌కు అథియా స‌మాధాన‌మిస్తూ, 5 శాతమే ప‌న్ను రేటు అమ‌ల‌వుతుంద‌ని వెల్ల‌డించారు. సౌర‌విద్యుత్తుతో ప‌నిచేసే వాట‌ర్ హీట‌ర్లు, పున‌ర్వినియోగ ఇంధ‌న ప‌రిక‌రాలు, వాటి త‌యారీకి వినియోగించే విడిభాగాలు, బ‌యో గ్యాస్ ప్లాంట్‌, సౌర విద్యుత్ ఆధారిత ప‌రిక‌రాల‌ను, సౌర విద్యుత్ వ్య‌వ‌స్థ‌, ప‌వ‌న విద్యుత్ యంత్రాల‌కు కూడా 5 శాతం ప‌న్ను రేటే అమ‌లు చేయాల‌ని జీఎస్టీ కౌన్సిల్ ఇప్ప‌టికే నిర్ణ‌యించింది.