* చెన్నై మెట్రో రూ.14,600 కోట్ల‌లో రూ.11 వేల కోట్లు రిలీజ్‌
తమిళనాడు రాజధాని చెన్నైలో కొత్తగా నిర్మించిన భూగర్భ మెట్రో రైలు మార్గాన్ని ఆ రాష్ట్ర ముఖ్యమంత్రి పళనిస్వామి సమక్షంలో కేంద్రమంత్రి వెంకయ్యనాయుడు ఇవాళ ప్రారంభించారు. మొదటి దశలో భాగంగా భూగర్భ రైలు మార్గాన్ని తిరుమంగళం నుంచి నెహ్రూ పార్క్‌ వరకు నిర్మించారు. ఏడున్నర కిలోమీటర్లు వున్న ఈ రైలు మార్గంలో మొత్తం 8 స్టేషన్స్ వున్నాయి. చెన్నైలో నిర్మించిన తొలి భూగర్భ రైలు మార్గం ఇదే కావడం విశేషం. 2009లో ఈ ప్రాజెక్టు అంచ‌నా వ్య‌యంగా రూ.14,600 కోట్లు అవుతుంద‌ని నిర్ణ‌యించారు. అందులో ఇప్ప‌టి దాకా రూ.11,300 కోట్లు విడుద‌ల చేశారు. మెట్రో 4 బోగీల కార్ ఒక ట్రిప్ తిర‌గ‌డం వ‌ల్ల 16 బస్సులు, 300 కార్లు, 600 ద్విచ‌క్ర వాహ‌నాల అవ‌స‌రం ఉండ‌ద‌ని భావిస్తున్నారు.

ఈ రైలు మార్గం ప్రారంభోత్సవం సందర్భంగా మాట్లాడిన తమిళనాడు ముఖ్యమంత్రి పళనిస్వామి.. చెన్నై మెట్రో రైలు ప్రాజెక్టుకి దివంగత ముఖ్యమంత్రి జయలలిత శంఖస్థాపన చేశారని గుర్తుచేసుకున్నారు. 2018 సగానికల్లా మెట్రో రైలు ప్రాజెక్ట్ ఫేస్ 1 మొత్తం పూర్తవుతుందని అన్నారు. అనంతరం కేంద్ర మంత్రి వెంకయ్య నాయుడు మాట్లాడుతూ... చెన్నై మెట్రో రైలు ప్రాజెక్ట్ దివంగత ముఖ్యమంత్రి జయలలిత స్వప్నం అని అన్నారు. ఈరోజు ఆమెని ఎంతో మిస్ అవుతున్నామని గుర్తు చేసుకున్నారు వెంకయ్య నాయుడు. చెన్నై మెట్రో ప్రాజెక్టు మొత్తం పూర్తయితే, 7.75 లక్షల మంది రాకపోకలు సాగించేందుకు వీలు కలుగుతుంది. చెన్నై మెట్రో ప్రాజెక్టు విస్తరణకి కేంద్రం చేయదగిన సహాయం అంతా చేస్తుందని ఈ సందర్భంగా కేంద్రమంత్రి వారికి హామీ ఇచ్చారు.