సత్యం కేసులో సెబీ (సెక్యూరిటీస్‌ ఎక్స్ఛేంజ్‌ బోర్డ్‌ ఆఫ్‌ ఇండియా) ఆదేశాలను సెక్యూరిటీస్‌ అప్పిలేట్‌ ట్రైబ్యునల్‌ (శాట్‌) సమర్థించింది. అయితే నిషేధ గడువును పునఃపరిశీలించాలని కోరింది. ఈ కేసులో సెక్యూరిటీస్‌ మార్కెట్లలో ప్రవేశించకుండా 10 మందిపై 14 ఏళ్ల పాటు నిషేధం విధించడమే కాక, చట్టవిరుద్ధంగా లాభాలు పొందినందున రూ.1849 కోట్లు చెల్లించాలని 2015లో సెబీ ఆదేశాలిచ్చింది. దీనిపై వారు శాట్‌ను ఆశ్రయించారు. సెబీ చట్టంలోని నిబంధనలను ఫిర్యాదిదారులు ఉల్లంఘించారని శాట్‌ పేర్కొంది.

స‌త్యం కుంభకోణం కేసులో సెక్యూరిటీస్‌ మార్కెట్లలోకి 14 ఏళ్ల పాటు ప్రవేశించకుండా ఫిర్యాదిదార్లందరినీ నిషేధిస్తూ సెబీ ఆదేశాలిచ్చింది. కానీ అందుకు తగిన కారణాలు చూపకపోవడం సబబు కాదని శాట్‌ పేర్కొంది. అక్క‌డ ఆ మేర‌కు నిషేధం విధించేందుకు చూపిన కార‌ణాలు స‌మ‌ర్థ‌నీయంగా లేవ‌ని ట్రైబ్యున‌ల్ అభిప్రాయ‌ప‌డింది. చట్టవిరుద్ధంగా ఆర్జించారని ప్రతి ఫిర్యాదిదారుపై పేర్కొన్న మొత్తం, అందుకు చూపిన ఆధారాలు పరస్పర విరుద్ధంగా ఉన్నాయని తెలిపింది. అందువల్ల నిషేధ గడువును పునఃపరిశీలించాల్సిందిగా కోరింది. సెక్యూరిటీల మార్కెట్లలోకి ప్రవేశించకుండా విధించిన గడువును, జరిమానాను నిలిపి వేస్తున్నట్లు శాట్‌ తెలిపింది. 4 నెలల్లోగా తాజా ఆదేశాలు జారీ చేయాలని సూచించింది.