ఇటీవ‌ల టెలికాం రంగంలో కాల్స్ కనెక్టివిటీ స‌మ‌స్య‌లు ఎక్కువ అవుతున్నాయి. ఈ అంశానికి సంబంధించి ప‌రిష్కారాల దిశ‌గా తొలి ద‌శ ప్ర‌య‌త్నాలు మొద‌ల‌యిన‌ట్లుగా క‌నిపిస్తోంది. కాల్స్ నాణ్య‌త కొల‌మానానికి గాను మైకాల్ పేరిట‌ ఒక యాప్‌ను తీసుకువ‌స్తున్న‌ట్లు టెలికాం రెగ్యులేట‌ర్ అథారిటీ ఆఫ్ ఇండియా(ట్రాయ్‌) తెలియ‌జేసింది.

కాల్ పూర్తైన త‌ర్వాత టెలికాం ఆప‌రేట‌ర్ సేవ‌ల ప‌ట్ల వినియోగ‌దారుడు ఈ యాప్ ద్వారా త‌న రేటింగ్‌ను ఇవ్వొచ్చు. త‌ద్వారా కాల్స్ నాణ్య‌త‌ను తెలుసుకునేందుకు అవ‌కాశం ఉంటుంద‌ని ట్రాయ్ 20 ఏళ్లు పూర్తిచేసుకున్న సందర్భంగా ఏర్పాటు చేసిన కార్య‌క్ర‌మంలో ట్రాయ్ ఛైర్మ‌న్ ఆర్ ఎస్ శ‌ర్మ చెప్పారు. ఇప్ప‌టికే వినియోగ‌దారుల‌కు అసౌక‌ర్యం క‌ల‌గ‌కుండా అవాంఛిత కాల్స్‌, ఎస్ఎంఎస్‌ల నిరోధానికి డు నాట్ డిస్ట‌ర్బ్ వ్య‌వ‌స్థ‌ను తెచ్చిన‌ట్లు ఆయ‌న గుర్తు చేశారు. త‌మ నియంత్ర‌ణ సంస్థ‌కు క‌స్ట‌మ‌ర్ల ప్ర‌యోజ‌నాలే ప్ర‌ధాన‌మ‌ని నొక్కి వ‌క్కాణించారు.