అంత‌కంత‌కు పెరుగుతున్న విదేశీ మార‌క నిల్వ‌లు కొత్త రికార్డుల‌ను నెల‌కొల్పాయి. ఏప్రిల్ 28తో ముగిసిన వారానికి జీవ‌న కాల గ‌రిష్టానికి చేరాయి. రిపోర్టింగ్ స‌మ‌యానికి 159.4 కోట్ల డాల‌ర్ల మేర వృద్ది చెంది 37273 కోట్ల డాల‌ర్ల‌కు చేరాయి. అంత‌కుముందు వారంలో 125 కోట్ల డాల‌ర్లు పెరిగి 37114 కోట్ల డాల‌ర్లుగా నమోద‌య్యాయి.

2016 సెప్టెంబ‌రు 30న న‌మోదైన 31119 కోట్ల డాల‌ర్లే ఇప్ప‌టివ‌ర‌కూ అత్య‌ధిక స్థాయిగా ఉండేది. స‌మీక్ష వారంలో విదేశీ క‌రెన్సీ ఆస్తులు(ఎప్‌సీఏలు) 156.9 కో్ట్ల‌ డాల‌ర్లు పెరిగి 34905.5 కోట్ల డాల‌ర్ల‌కు చేరుకున్నాయి. ప‌సిడి నిల్వ‌లు 1986.9 కోట్ల డాల‌ర్ల స్థాయి వ‌ద్దే ఉన్నాయి. అంత‌ర్జాతీయ ద్ర‌వ్య నిధి(ఐఎంఎఫ్‌) సంస్థ వ‌ద్ద ఉండే స్పెష‌ల్ డ్రాయింగ్ రైట్స్ 85 ల‌క్ష‌ల డాల‌ర్లు అధిక‌మై 146 కోట్ల డాల‌ర్లుగా న‌మోద‌య్యాయి. అలాగే ఐఎంఎఫ్ వ‌ద్ద క‌ల దేశ నిల్వ‌ల స్థానం కూడా 1.58 కోట్ల డాల‌ర్ల మెరుగుద‌ల‌తో 234.7 కోట్ల డాల‌ర్ల వ‌ద్ద ఉంది.