దేశంలో బ్యాంకుల‌న్నీ ఆర్బీఐ అధీనంలో ఉంటాయి. అంటే డ‌బ్బు నిర్వ‌హ‌ణ అంతా వారి చేతుల్లోనే ఉంటుంది. అలాంటి బ్యాంకు గవర్నర్ అంటే.. దేశ ఆర్థిక వ్యవస్థకు అత్యంత ముఖ్యమైన వ్యక్తుల్లో ఒకరు. ఆ హోదాలోని వ్యక్తి నిర్ణయాల మీదే దేశ ఆర్థిక వ్యవస్థ ఆధారపడి ఉంటుంది. వేల, లక్షల కోట్ల వ్యవహారాలను నిత్యం ఆర్బీఐ గవర్నర్ ప‌ర్య‌వేక్షిస్తారు. భారతదేశ ఆర్థిక వ్యవస్థనే ప్రభావితం చేయగల ఆ హోదాలోని వ్యక్తి జీతం మాత్రం ఆ స్థాయితో పోలిస్తే చాలా చాలా తక్కువనే చెప్పాలి. తాజాగా పెరగడంతో ఆర్బీఐ చీఫ్ జీతభత్యాల వ్యవహారం ఆసక్తికరంగా వార్తల్లోకి వచ్చింది. ఆర్బీఐ గవర్నర్ జీతం వివరాలు ఆర్టీఐ ద్వారా వెలుగులోకి వచ్చాయి. దీంతో వివిధ స్థాయిల్లో ఉండే వ్య‌క్తుల వేత‌నాల‌ను పోల్చి చూసేందుకు జ‌నం ఆస‌క్తి చూపుతున్నారు.

వీటి ప్రకారం.. ఇటీవలే ఆర్బీఐ గవర్నర్ జీతం పెరిగింది. పెరిగినదాని ప్రకారం ప్రస్తుత ఆర్బీఐ గవర్నర్ ఊర్జిత్ పటేల్ నెలకు 2.5 లక్షల రూపాయల బేసిక్ పే పొందుతారు. ఇక డీకే, ఇతర చెల్లింపులు కలుపుకుని లెక్కేస్తే ఆయన మొత్తం వేతనం రూ.3.7 లక్షలు. మొన్నటి వరకూ ఈ మొత్తం రూ.2.09 లక్షలుగా ఉండేది. పెంపుదలతో 3.7 లక్షల రూపాయలకు చేరింది. ప్ర‌స్తుతం దేశ ప్ర‌ధాన వేత‌నం ఏడాదికి దాదాపు రూ.21 లక్ష‌లు ఉండ‌గా, ఆర్‌బీఐ గ‌వ‌ర్న‌ర్ 30 ల‌క్ష‌ల‌కు మించి వార్షిక వేత‌నాన్ని అందుకోనున్నారు.