ఆఫర్ల కిక్కుతో వినియోగ‌దార్ల‌ను ముంచెత్తుతున్న‌రిలయన్స్ జియోకు అడ్డుకట్ట వేసేందుకు టెలికాం సంస్థ‌ల‌న్నీ వ్యూహాలు రచిస్తున్నాయి. రకరకాల ప్లాన్లతో ముందుకొస్తున్న నెట్‌వర్క్ కంపెనీల జాబితాలో ప్ర‌స్తుతం ప్రభుత్వ టెలికాం సంస్థ బీఎస్ఎన్ఎల్ సైతం చేరింది. జియోకు పోటీగా మంగళవారం రూ.339తో ప్రత్యేకంగా ఓ ప్లాన్‌ను తీసుకొచ్చింది. ఈ ప్లాన్ ద్వారా వినియోగదారులు రోజుకు 2జీబీ డేటాను ఉపయోగించుకోవచ్చు.

''జియో, ఇతర ప్రైవేటు కంపెనీల నుంచి ఎదురవుతున్న పోటీని తట్టుకునేందుకు అత్యంత చవకైన ప్లాన్‌ను తీసుకొస్తున్నాం. రూ.339 తో తీసుకొచ్చిన ఈ ప్లాన్ ద్వారా వినియోగదారులు రోజుకు 2జీబీ డేటాను పొందవచ్చు'' అని బీఎస్ఎన్ఎల్ జనరల్ మేనేజర్ సంజీవ్ త్యాగి తెలిపారు. ''ఒకనెలలో వినియోగదారులు 30 జీబీ డేటాను వినియోగించుకోవచ్చు, రోజుకు ఉచితంగా 25 కాల్స్ చేసుకోవచ్చు. 25 నిమిషాల గ‌డువు పూర్త‌యిన త‌ర్వాత‌ నిమిషానికి 25 పైసల చొప్పున చార్జీ విధిస్తాం'' అని ఆయన వివరించారు. ఏప్రిల్ 1 నుంచి ఈ ప్లాన్ అందుబాటులోకి వస్తుందని త్యాగి వివరించారు. ప్ర‌యివేటు రంగంలోని టెలికాం సంస్థ‌లు స‌రికొత్త ఆఫ‌ర్ల‌తో ఎప్ప‌టిక‌ప్పుడు వినియోగ‌దార్ల‌ను ఆక‌ట్టుకుంటున్న నేప‌థ్యంలో బీఎస్ఎన్ఎల్ సైతం మంచి ఆఫ‌ర్ ఇవ్వ‌డం క‌స్ట‌మ‌ర్ల‌ను సంతోషానికి గురిచేస్తోంది.