హెచ్‌-1బీ వీసాల ప్రీమియం ప్రాసెసింగ్‌ను తాత్కాలికంగా రద్దు చేస్తున్నట్లు అమెరికా ప్రకటించింది. ఈ విష‌యాన్ని యూఎస్‌ సిటిజన్‌షిప్‌ అండ్‌ ఇమ్మిగ్రేషన్‌ సర్వీసెస్‌ (యూఎస్‌సీఐఎస్‌) వెల్లడించింది. ఏప్రిల్‌ 3 నుంచి హెచ్‌1బీ వీసాల ప్రీమియం ప్రాసెసింగ్‌ రద్దు అమల్లోకి రానుంది. దాదాపు 6 నెల‌ల పాటు ప్రీమియం పెండింగ్‌లో ఉన్న రెగ్యులర్‌ హెచ్‌-1బీ వీసాల దరఖాస్తులను పరిష్కరించేందుకు ఈ నిర్ణయం తీసుకున్న‌ట్లు అగ్ర రాజ్యం వెల్ల‌డించింది. ప్రత్యేక ఫీజుతో హెచ్‌-1బీ వీసాల ప్రాసెస్‌ త్వరగా పూర్తిచేసుకునే 'ప్రీమియం ప్రాసెసింగ్‌'కు మాత్రమే ఈ తాత్కాలిక రద్దు వర్తిస్తుంది. అదనంగా 1,125డాలర్లు చెల్లిస్తే కంపెనీలు ద‌ర‌ఖాస్తు చేసే ప్రీమియం ప్రాసెసింగ్‌కు అవకాశం క‌ల్పిస్తారు. ప్రస్తుతం దీన్ని కొన్ని నెల‌ల పాటు రద్దు చేశారు. రెగ్యులర్‌ హెచ్‌-1బీ వీసాలకు ఎలాంటి ఇబ్బంది ఉండదు. దీన్ని హెచ్‌1-బీ వీసాల సస్పెన్ష‌న్‌గా ప‌రిగ‌ణించ‌కూడద‌ని ఇమ్మిగ్రేష‌న్ విభాగం శుక్ర‌వారం వెల్ల‌డించింది.

హెచ్‌-1బీ వీసాల ప్రాసెసింగ్‌ సమయం తగ్గించడానికి ఈ తాత్కాలిక రద్దు ఉపయోగపడుతుందని యూఎస్‌సీఐఎస్‌ తెలిపింది. ప్రీమియం ప్రాసెసింగ్‌కు 15 రోజుల సమయం పడుతుండగా, రెగ్యులర్‌ హెచ్‌-1బీ వీసాల ప్రాసెసింగ్‌కు మూడు నెలలకు పైగా పడుతోంది. ప్రీమియం ప్రాసెసింగ్‌ అప్లికేషన్ల వల్ల రెగ్యులర్‌ దరఖాస్తుల ప్రాసెసింగ్‌ సమయం బాగా పెరిగిపోతోందని అందుకే వాటిని తాత్కాలికంగా ర‌ద్దు చేయాల‌ని భావిస్తున్న‌ట్లు అమెరికా వెల్లడించింది. అమెరికాలో ఉద్యోగం చేసుకోవడానికి నైపుణ్యంగల వారికి ఇచ్చే తాత్కాలిక వర్క్‌ వీసా హెచ్‌-1బీని ఎక్కువగా భారత ఐటీ ఇంజినీర్లు వినియోగిస్తున్న‌సంగతి తెలిసిందే.