ఈ రోజు దేశీయ మార్కెట్లు లాభాల్లో ప‌య‌నించాయి. మూడో త్రైమాసికం(అక్టోబర్‌-డిసెంబర్‌)లో ఆర్థిక వృద్ధి అంచ‌నాల‌ను మించి 7 శాతంగా న‌మోద‌వ‌డంతో మార్కెట్లలో ఉత్సాహం నెల‌కొంది. పెద్ద నోట్ల రద్దు కారణంగా ఈ ఆర్థిక సంవత్సరం మూడో్ త్రైమాసికంలో స్థూల దేశీయోత్పత్తి(జీడీపీ) 6 శాతంలో్పునకే పరిమితంకావచ్చన్న అంచనాలు త‌ప్ప‌ని తేలిపోవడంతో పెట్టుబ‌డిదార్ల‌కు ఒక్కసారిగా జోష్‌ వచ్చింది. అటు ట్రేడర్లు సైతం కొత్త పొజిషన్లకు ఆసక్తి చూపడంతో రెండు రోజుల వరుస నష్టాలకు అడ్డుక‌ట్ట‌ పడింది. మార్కెట్లు కన్సాలిడేషన్‌ బాటవీడి జోరందుకున్నాయి. వెరసి నేటి ట్రేడింగ్‌లో సెన్సెక్స్‌ 29,000 పాయింట్ల మైలురాయిని రెండుసార్లు అధిగమించగా.. సాంకేతికంగా కీలకమైన 8,950 స్థాయిని నిఫ్టీ అందుకుంది. ట్రేడింగ్‌ ముగిసేసరికి దాదాపు రోజులో గరిష్టానికి సమీపంలోనే సెన్సెక్స్‌ 28,984 వద్ద నిలిచింది. నికరంగా 241 పాయింట్లు జంప్‌చేసింది. నిఫ్టీ సైతం 66 పాయింట్లు జమచేసుకుని 8,946 వద్ద స్థిరపడింది.