అంత‌ర్జాతీయంగా సానుకూల ప‌రిస్థితులు ఉన్న‌ప్ప‌టికీ దేశీయ మార్కెట్ల‌కు అవేవీ క‌లిసి రాలేదు. వాహ‌న‌, స్థిరాస్తి, హెల్త్‌కేర్‌, క‌న్సూమ‌ర్ డ్యూర‌బుల్స్ రంగాల్లో నెల‌కొన్న అమ్మ‌కాల ఒత్తిడితో సూచీలు బాగా న‌ష్ట‌పోయాయి. మార్కెట్ ముగిసే స‌రికి సెన్సెక్స్ 183.75(0.65%) పాయింట్లు కోల్పోయి 28,155.56 వ‌ద్ద నిల‌వ‌గా; నిఫ్టీ 68 పాయింట్లు న‌ష్ట‌పోయి 8725 వ‌ద్ద ముగిసింది.

ఇటీవ‌ల గ‌త కొద్ది రోజులుగా లాభ‌ప‌డ్డ ఇన్వెస్ట‌ర్లు లాభాల స్వీక‌ర‌ణ‌కు దిగ‌డంతో పాటు, టాటా మోటార్స్‌, స‌న్‌ఫార్మా వంటి షేర్లు న‌ష్టాల‌కు గుర‌వ‌డం మార్కెట్ సెంటిమెంటును దెబ్బ‌తీసింద‌ని బ్రోక‌ర్లు అభిప్రాయ‌ప‌డుతున్నారు.

టాటా మోటార్స్ దెబ్బ‌తో వాహ‌న రంగం బాగా న‌ష్ట‌పోయింది. బీఎస్ఈ సెన్సెక్స్‌లో ఎఫ్ఎంసీజీ త‌ప్ప అన్ని రంగాలు న‌ష్టాల్లోనే ప‌య‌నించాయి. స్థిరాస్తి రంగం(3.53%), వాహ‌న రంగం(3.03%), హెల్త్‌కేర్‌(1.9%), క‌న్సూమ‌ర్ డ్యూర‌బుల్స్‌(1.61%) న‌ష్ట‌పోగా; ఎఫ్ఎంసీజీ మాత్రం 0.08% లాభ‌ప‌డి ప‌ర్వాలేద‌నిపించింది.