మంగ‌ళ‌వారం విడుద‌ల చేసిన పీఎన్‌బీ మూడో త్రైమాసిక ఫ‌లితాల్లో గ‌ణ‌నీయంగా 306% త‌గ్గుద‌ల న‌మోదు చేసింది. డిసెంబ‌రు 31,2016తో ముగిసిన మూడు నెల‌ల కాలానికి కేవ‌లం 207.18(51.01)కోట్ల లాభాన్ని మాత్ర‌మే రాబ‌ట్టగ‌లిగింది. అంత‌కు ముందు ఏడాది డిసెంబ‌రు త్రైమాసికంలో కంటే ఇది క్షీణించింది. అంతే కాకుండా సెప్టెంబ‌రు త్రైమాసికంలో నిక‌ర లాభం 549.36 కోట్లుగా ఉంది.

డిసెంబ‌రు 31,2016తో ముగిసిన 9 నెల‌ల కాలానికి పీఎన్‌బీ నిక‌ర లాభం 1062 కోట్లు కాగా అంత‌కు ముందు ఆర్థిక సంవ‌త్స‌రం అదే స‌మ‌యానికి అది 1392 కోట్లుగా ఉంది. ఫ‌లితాల సంద‌ర్భంగా బ్యాంకు సీఎండీ అనంత సుబ్ర‌మ‌ణియ‌న్ విలేక‌రుల‌తో మాట్లాడారు. మొత్తం ఆర్థిక సంవ‌త్స‌రానికి గాను చెప్పుకోద‌గ్గ రీతిలో నిక‌ర లాభాన్ని సాధించ‌గ‌ల‌మ‌ని ఆశాభావం వ్య‌క్తం చేశారు. నోట్ల ర‌ద్దు స‌మ‌యంలో(న‌వంబ‌ర్ 8-డిసెంబ‌రు 31) త‌మ‌ బ్యాంకుకు క‌రెంటు, పొదుపు ఖాతాల ద్వారా రూ. 54 వేల కోట్ల డ‌బ్బు జ‌మ అయింద‌ని అన్నారు. ఇందులో 40% బ్యాంకుల ద‌గ్గ‌రే ఉంటుంద‌ని అంచ‌నా వేస్తున్న‌ట్లు చెప్పారు. ఇటీవ‌ల పీఎన్‌బీ పోస్ట‌ల్ బ్యాంకుతో ఎంవోయూ కుదుర్చుకుంద‌న్నారు.