ఆటో విడిభాగాల దేశీ సంస్థ మదర్‌సన్‌ సుమీ సిస్టమ్స్‌... ఫిన్లాండ్ కంపెనీ పీకేసీ గ్రూప్‌ను కొనుగోలు చేయనున్నట్లు వార్తలు వెలువడ్డాయి. ట్రక్కులలో వినియోగించే వైర్ల తయారీ సంస్థ అయిన పీకేసీ కొనుగోలుకి దాదాపు 61 కోట్ల డాలర్లను(రూ. 4000 కోట్లు) వెచ్చించనున్నట్లు తెలుస్తోంది. అంత‌ర్జాతీయంగా మ‌రింత విస్త‌రించాల‌న్న ఆలోచ‌న‌తో ఈ కంపెనీని హ‌స్త‌గ‌తం చేసుకునేందుకు మ‌ద‌ర్‌స‌న్ ప్ర‌య‌త్నిస్తోంది. పీకేసీ గ్రూప్‌కు చెందిన షేర్లు, ఓటింగ్ హ‌క్కులు కొనుగోలు చేసేందుకు ఒక స్వ‌చ్చంద ప్ర‌తిపాద‌న‌ను వెలువ‌రించ‌డానికి జ‌న‌వ‌రి 19న జ‌రిగిన బోర్డు స‌మావేశంలో నిర్ణ‌యించిన‌ట్లు మ‌ద‌ర్‌స‌న్ ప్ర‌క‌టించింది. నిన్నటి ప‌రిణామంతో మ‌ద‌ర్‌స‌న్ సుమి షేర్లు 0.20% న‌ష్ట‌పోయాయి.