డిజిటల్‌ లావాదేవీలకు ఆస‌క్తి పెరిగేలా స్టేట్‌ బ్యాంక్‌ ఆఫ్‌ ఇండియా (ఎస్‌బీఐ) సోమవారం కీలక నిర్ణయం తీసుకుంది. దేశ‌మంతా డిజిట‌ల్ బాట ప‌డుతున్న త‌రుణంలో కార్డు లావాదేవీల‌కు అయ్యే ఖ‌ర్చును ఎవ‌రు భ‌రించాల‌నే దానిపై త‌ర్జ‌న భ‌ర్జ‌న కొన‌సాగుతోంది. ఈ నేప‌థ్యంలో చిన్న వ్యాపారుల‌కు స్వాంత‌న చేకూర్చేలా ఎస్‌బీఐ ముంద‌డుగు వేసింది. వార్షిక టర్నోవర్‌ రూ. 20 లక్షల వరకూ ఉన్న చిన్న వ్యాపారులకు ఈ ఏడాది చివరి వరకూ (31 డిసెంబర్‌ 2017)డెబిట్‌ కార్డు లావాదేవీలపై (మర్చంట్‌ డిస్కౌంట్‌ రేట్‌- ఎండీఆర్‌) చార్జీ రద్దు చేస్తున్నట్లు ప్రకటించింది.

కార్డు చెల్లింపుల వల్ల ప్రయోజనాలు చిన్న వ్యాపారులకు అందుబాటులోకి తేవడం లక్ష్యంగా ఈ నిర్ణయం తీసుకున్నట్లు బ్యాంక్‌ ఒక ప్రకటనలోతెలిపింది. ప్రభుత్వ డిజిట‌ల్ కార్య‌క్ర‌మాల‌కు మ‌ద్ద‌తుగా తనవంతు కృషికి కట్టుబడి ఉన్నట్లు ప్ర‌భుత్వ రంగ బ్యాంకు పేర్కొంది. దేశంలో మెట్రో నగరాల నుంచి గ్రామాల వరకూ పీఓఎస్‌ ఆమోదిత మౌలిక సదుపాయాలను విస్తరిస్తున్నట్లు పేర్కొంది.