ఎన్నారైల‌కు ఫెమా కింద రూ. 25 వేల డిపాజిట్ ప‌రిమితి
పెద్ద నోట్లను బ్యాంకుల్లో డిపాజిట్ చేసుకునేందుకు గ‌డువు పూర్త‌యింది. ఇకపై ఎవ‌రైనా తమ వ‌ద్ద‌ ఉన్న పాత నోట్లను డిపాజిట్ చేయాలంటే ఆర్బీఐ శాఖలకు వెళ్లాల్సిందే. ఇలాంటి సమయంలో దేశంలో డిపాజిట్ చేసే ఎన్ఆర్‌ఐలు, విదేశాల్లో ఉంటున్న భారతీయుల విషయంలో కేంద్రం కొత్త మెలిక పెట్టింది. డిపాజిట్‌ చేసే కంటే ముందు.. ఆయా వ్యక్తులు కస్టమ్స్‌ అధికారుల నుంచి ధ్రువీకరణ పత్రాలు పొంది, ఆ పత్రాల్లో ఎంత డబ్బైతే నమోదు చేశారో.. అంత మొత్తం మాత్రమే ఆర్బీఐ శాఖల్లో జమ చేయాల్సి ఉంటుందని పేర్కొంది. ప్ర‌వాస భార‌తీయులు మార్చి 31 త‌ర్వాత ముంబ‌యి, న్యూఢిల్లీ, చెన్నై, కోల్‌క‌త‌, నాగ్‌పూర్ ఆర్బీఐ కార్యాల‌యాల‌ను డిపాజిట్ చేసుకునేందుకు ఉప‌యోగించుకోవ‌చ్చు.

విదేశాలకు వెళ్లే భారతీయులకైతే మార్చి 31 వరకు, ఎన్ఆర్‌ఐలకు జూన్‌ 30 వరకు ఆర్బీఐ శాఖల్లో డబ్బు డిపాజిట్‌ చేసేందుకు అవ‌కాశాన్నిచ్చారు. అయితే.. విదేశాల‌ నుంచి వచ్చి తమ పాత నగదును డిపాజిట్‌ చేసేందుకు దేశానికి వచ్చేవారు.. ఆయా విమానాశ్రయాల్లో తాము డిపాజిట్‌ చేసే పాత డబ్బును చూపించాల్సి ఉంటుంది. అర్హులైన భారత పౌరులు ఎంత డబ్బు మార్చుకోవాలన్న దానిపై పరిమితి లేదని, ఎన్నారైలకు మాత్రం ఫెమా చట్ట నిబంధనల కింద ఒక్కొక్కరి రూ. 25వేలు పరిమితి ఉంటుందని ఆర్థిక శాఖ తెలిపింది.