పెద్ద నోట్ల మార్పిడి నవంబ‌రు 8న‌ కేంద్ర ప్రభుత్వం తీసుకున్న సంచలన నిర్ణయం. నేటికి దాదాపు 87 రోజులు కావస్తోంది. రూ.500, రూ.1000 పెద్ద నోట్ల రద్దుతో ప్రజల్లో నెలకొన్న గంద‌ర‌గోళం ఇప్ప‌టికీ స‌మ‌సిపోలేదు. దశల వారీగా ఆంక్షలను ఎప్పడికప్పుడు మారుస్తున్న కేంద్ర ప్రభుత్వం, ఆర్‌బిఐ నిర్ణయాలకు అనుగుణంగా ప్రజలు నడుచుకోవాల్సిన క‌ట్టుదిట్ట‌మైన‌ పరిస్థితికి మరో ఐదు రోజుల్లో తెరపడనుందా..? సర్వత్రా అన్ని వర్గాల్లో నెలకొన్న ఆందోళ‌న‌. వారం రోజుల్లో కొత్త రూ.500 నోట్లను అందుబాటులోకి తెస్తామన్న ప్రభుత్వం ఆశించిన స్థాయిలో ఆ దిశ‌గా ప్ర‌య‌త్నాలు చేయ‌లేదు. దాదాపు 30 శాతం ఏటీఎమ్‌లు నేటికీ తెరుచుకోలేదు. ఉన్న ఏటిఎమ్‌లలో ఎక్కడ చూసినా నోక్యాష్..అవుట్ ఆఫ్ సర్వీస్ బోర్డులు దర్శనమిస్తున్నాయి. అరకొర ఏటిఎంలలో వచ్చినా అదీ రూ.2 వేల కొత్త నోటు మాత్రమే. దానికి చిల్లర దొరకక ప్రజలు అనుభవిస్తున్న బాధలు వర్ణనాతీతం. పెద్ద నోట్లు బ్యాంకులో డిపాజిట్ చేసేందుకు..నగదు విత్‌డ్రాపై ఆంక్షలు డిసెంబర్ 30తో నైనా తొలగేనా అని నగర వాసులు ఎదురు చూస్తున్నారు.