స్నాప్‌డీల్ ద్వారా రూ.1 తో ఇంటికి రూ.2000

ఇప్పటి వరకు వ‌స్తువుల‌నే అమ్ముతున్న స్నాప్‌డీల్ న‌గ‌దు కొర‌త నేప‌థ్యంలో ఒక స‌రికొత్త స‌దుపాయాన్నిప్రారంభించింది. ఆన్‌లైన్‌లో ఆర్డ‌ర్ చేస్తే వినియోగదారుల చెంతకే న‌గ‌దు రానుంది. ఏంటీ... ఇది ఎలా సాధ్యమ‌ని నమ్మ‌లేక‌పోతున్నారా? అయితే ఈ క‌థ‌నాన్నిచ‌దివి అర్థం చేసుకోండి..!

ఈ-కామ‌ర్స్ వెబ్‌సైట్ స్నాప్‌డీల్ ఉంది కదా... దాని ద్వారా ఇక‌పై క‌స్ట‌మ‌ర్లు తమ ఇంటి వద్దకే నగదును క్యాష్ ఆన్ డెలివరీ పద్ధతిలో పొందవచ్చు. ఈ సేవ‌ను క్యాష్‌@హోం పేరుతో వ్య‌వ‌హ‌రిస్తున్నారు. వినియోగ‌దారు ముందుగా స్నాప్‌డీల్ సైట్‌లోకి వెళ్లి రూ.1 కనీస చార్జి చెల్లించి నగదు కావాలని రిక్వెస్ట్ పెడితే చాలు, ఇంటికి కొరియర్ సర్వీస్ వచ్చి వస్తువులు అందించినట్టుగానే నగదును పీఓఎస్ మెషిన్ల ద్వారా అందిస్తారు. ఆ సమయంలో వినియోగదారుడు తన వద్ద ఉన్న ఏ బ్యాంకు ఏటీఎమ్ కార్డునైనా ఆ మెషీన్‌లో స్వైప్ చేస్తే చాలు, కొరియర్ సర్వీస్ వారు రూ.2వేల నోటును వినియోగదారులకు అందిస్తారు.

నోట్ల రద్దు నేపథ్యంలో ఏటీఎంలు, బ్యాంకుల వద్ద ప్ర‌జ‌లు చాలా స‌మ‌యం వ్య‌థ‌లు ప‌డుతున్నారనే ఆలోచనతో స్నాప్‌డీల్ ఈ వినూత్న కార్యక్రమాన్ని త్వరలో అందుబాటులోకి తేనుంది. దీని వల్ల వినియోగదారులు తమకు కావల్సిన నగదును ఇంటి వద్దే పొందవచ్చు. అలా నగదు క్యాష్ ఆన్ డెలివరీ అవుతుందన్నమాట. అయితే క్యాష్@హోం అని పిలవబడుతున్న ఈ ప్రాజెక్టు ప్రస్తుతానికి గుర్గావ్, బెంగుళూరులలో ప్రారంభం కానుంది. అనంతరం ఇతర మెట్రో సిటీలు, పట్టణాలకు విస్తరించనుంది.