వ‌చ్చే మూడేళ్ల కాలానికి క్యాబ్ రైడ్ల‌ను సుల‌భ‌త‌రం చేసేందుకు దేశీయ మొబైల్‌ తయారీ సంస్థ మైక్రోమాక్స్ అంత‌ర్జాతీయ క్యాబ్ నిర్వ‌హ‌ణ సంస్థ‌ ఉబర్‌తో ఒప్పందం చేసుకుంది. దీంతో ఇకమీద‌ట‌ మైక్రోమాక్స్‌ మొబైల్‌ ఫోన్లలో ఉబ‌ర్‌యాప్‌ ఇన్‌బిల్ట్‌గా వ‌స్తుంది. దీని ద్వారా మరింత మందికి చేరువయ్యే అవకాశం ఏర్పడిందని ఉబెర్‌ పేర్కొంది.

నూత‌న‌ ఒప్పందంతో 10 కోట్ల‌ మైక్రోమాక్స్‌ స్మార్ట్‌ఫోన్లలో ఉబెర్‌యాప్ ముందుగానే ఇన్‌స్టాల్ అయి ఉంటుంది. ఈ యాప్‌తో పాటు ఫుడ్‌, ట్రావెల్‌, షాపింగ్‌, క్రికెట్‌, న్యూస్‌, వాతావ‌ర‌ణ సంబంధిత‌, ప‌బ్లిష‌ర్స్‌(పుస్త‌క ప్ర‌చుర‌ణ‌) యాప్‌లు కూడా రానున్నాయి. నూత‌నంగా వ‌చ్చే ఫోన్ల‌లో దేశీయ అవ‌స‌రాల‌కు త‌గ్గ సేవ‌ల‌ను అందుబాటులో ఉంచేందుకు మైక్రోమ్యాక్స్ ప్ర‌య‌త్నిస్తోంది.ఈ ఒప్పందంతో మైక్రోమాక్స్ ఫోన్ల ద్వారా ఉబర్‌ వృద్ధి గణనీయంగా ఉండే అవ‌కాశం ఉంది. అంతేకాకుండా ఇది వినియోగదారులకు సైతం ఉపయోగపడనుంది. త‌ద్వారా ఉత్తమమైన అనుభూతిని వినియోగదారులు పొందవచ్చని మైక్రోమాక్స్‌ సహ వ్యవస్థాపకుడు రాహుల్‌ శర్మ తెలిపారు. ప్ర‌స్తుతం మైక్రోమ్యాక్స్ ఫోన్ వినియోగిస్తున్న‌వారికి సైతం గూగుల్ ప్లేస్టోర్లో ఉబ‌ర్ యాప్ అందుబాటులో ఉంది.