కూరగాయల ధరలు, ఇతరత్రా వంట సరకుల ధ‌ర‌లు త‌గ్గుముఖంతో గత నెల టోకు ద్రవ్యోల్బణం (డబ్ల్యుపిఐ) దిగివచ్చింది. నవంబర్‌లో 3.15 శాతంగానే నమోదైంది. టోకు ద్రవ్యోల్బణం వ‌రుస‌గా మూడో నెలా త‌గ్గింది. నిరుడు నవంబర్‌లో మైనస్ 2.04 శాతంగా ఉండగా, ఈ ఏడాది అక్టోబర్‌లో 3.39 శాతంగా ఉంది.

మరోవైపు రిటైల్‌ ద్రవ్యోల్బణం కూడా త‌గ్గిన సంగ‌తి తెలిసిందే. పాత పెద్ద నోట్ల రద్దు నేపథ్యంలో గత నెల నవంబర్‌లో రెండేళ్ల కనిష్ట స్థాయిని తాకి 3.63 శాతంగానే నమోదైంది. 2014 నవంబర్‌లో 3.23 శాతంగా నమోదవగా, మళ్లీ ఆ తర్వాత ఇప్పుడే ఆ స్థాయి స‌మీపానికి రిటైల్ ద్రవ్యోల్బణం గణాంకాలు చేరాయి. ఇకపోతే వినియోగదారుల ధరల సూచీ (సిపిఐ) ఆధారిత ఈ ద్రవ్యోల్బణం అంతకుముందు అక్టోబర్ నెలలో 4.20 శాతంగా ఉన్నట్లు మంగళవారం గణాంకాలు, ప్రణాళిక అమలు మంత్రిత్వ శాఖ తెలిపింది. కూరగాయల ధరలు 10.29 శాతం పడిపోగా, పప్పుధాన్యాలు, గుడ్లు, మాంసం, చేపల ధరలూ తగ్గుముఖం పట్టాయి. నల్లధనం, నకిలీ కరెన్సీల నిర్మూలనకు నవంబర్ 8వ తేదీ రాత్రి పాత 500, 1,000 రూపాయల నోట్లను రద్దు చేస్తున్నట్లు ప్రధాన మంత్రి నరేంద్ర మోదీ స్వయంగా ప్రకటించిన సంగ‌తి విదిత‌మే.