నగదు రహిత లావాదేవీల‌ను ప్రోత్స‌హించే దిశగా నరేంద్ర మోదీ నేతృత్వంలోని కేంద్ర ప్రభుత్వం మరో కీలక నిర్ణయం తీసుకుంది. ప్ర‌భుత్వం చేసే చెల్లింపుల‌ విలువ రూ.5 వేలు, అంతకు ఎక్కువైతే కాంట్రాక్టర్లు, రుణ సంస్థలు, సరఫరాదారులెవరికైనా డిజిట‌ల్ చెల్లింపులు (ఈ-పేమెంట్‌) చేయాలని కేంద్ర ఆర్థిక శాఖ అన్ని ప్ర‌భుత్వ శాఖ‌ల‌ను కోరింది. ఈ మేర‌కు ఆర్థిక మంత్రిత్వ శాఖ సోమ‌వారం ఒక ప్ర‌క‌ట‌న విడుద‌ల చేసింది. ప్రభుత్వం చేయాల్సిన చెల్లింపుల‌న్నీ ఆన్‌లైన్‌లోనే జ‌రిగేలా చూసేందుకు వీలుగా ఈ నిర్ణ‌యం తీసుకున్న‌ట్లు తెలుస్తోంది. ఈ సంవ‌త్స‌రం ఆగ‌స్టు నెల‌లో రూ. 10 వేల‌కు పైబ‌డిన చెల్లింపుల‌ను ఆన్‌లైన్‌లోనే చేప‌ట్టాల‌న్న నిబంధ‌న విధించగా ప్ర‌స్తుతం దాన్ని రూ. 5 వేల‌కు త‌గ్గించారు. దీని ప్ర‌కారం అన్ని కేంద్ర ప్ర‌భుత్వ శాఖ‌లు ఇక‌పై స‌ర‌ఫ‌రాదారులు, కాంట్రాక్ట‌ర్లు,రుణ సంస్థ‌ల‌కు రూ. 5 వేల‌కు మించి చేసే చెల్లింపుల‌న్నీ డిజిట‌ల్ ప‌ద్ద‌తిలో చేప‌ట్టాల్సి ఉంటుంది.