పెద్ద నోట్లను రద్దు చేస్తూ ప్రధాని నరేంద్ర మోడీ తీసుకున్న నిర్ణయంపై నోబెల్ అవార్డు గ్రహీత అమర్త్యసేన్ స్పందించారు. పెద్ద నోట్ల రద్దును ఆయన తీవ్రంగా వ్యతిరేకించారు. భారత్‌లో ఉండే ప్రతిఒక్కరి దగ్గర నల్లధనం ఉందని మోడీ ప్రభుత్వం అనుమానిస్తోందని ఆయన విమ‌ర్శించారు. పెద్ద నోట్ల రద్దు వల్ల సామాన్య ప్రజలు తీవ్ర ఇబ్బందులు పడుతున్నారని ఆవేదన వ్యక్తం చేశారు. పెద్ద నోట్ల రద్దు వల్ల నల్ల ధనం వెనక్కి రాదని ఆయన అభిప్రాయపడ్డారు. ఎటువంటి ముందస్తు చర్యలు లేకుండా హఠాత్తుగా తీసుకున్న నిర్ణయం వల్ల ప్రజలను క్లిష్ట పరిస్థితుల్లోకి నెట్టినట్లవుతోందని ఆయన అన్నారు. భారత్‌లో ఉన్న వారందరూ నిజాయితీగా లేరని మోడీ భావిస్తున్నారని, అది సరైన పద్దతికాదని ఆయన పేర్కొన్నారు. నల్ల ధనాన్ని వెనక్కి తీసుకువస్తానని మోడీ ఇచ్చిన హామీలను అమలు చేయడంలో పూర్తిగా విఫలమయ్యారని ఎద్దేవా చేశారు.