డాలర్ తో పోలిస్తే రూపాయి విలువ భారీ పతనంపై రిజ‌ర్వ్‌ బ్యాంక్ రంగంలోకి దిగింది. డాలర్ మారకపు విలువలో రోజు రోజుకు క్షీణిస్తున్న దేశీయ కరెన్సీని ఆదుకునేందుకు ఆర్‌బీఐ అవ‌స‌ర‌మైన చర్యలు చేపట్టింది. గురువారం ఉదయం సుమారు రూ.68.80 మార్కుకు పడిపోయిన రూపాయికి మద్దతిచ్చేందుకు భారీ ఎత్తున డాలర్ అమ్మకాలు చేసింది. దీంతో కనిష్ట స్థాయిలనుంచి కోలుకుంది. 68.80 స్థాయినుంచి కోలుకొని 2.59 గం.ల స‌మ‌యానికి డాల‌రుతో రూపాయి 68.75 వ‌ద్ద ట్రేడ‌వుతోంది.

సుమారు 500 మిలియన్ డాలర్లను కేంద్ర బ్యాంకు విక్రయించిందని ట్రేడర్లు తెలిపారు. ఆర్ బీఐ జోక్యంతో రికార్డు స్థాయి క‌నిష్టాన్ని చేరిన‌ రూపాయి కోలుకుందని విశ్లేషిస్తున్నారు. అమెరికా అధ్యక్షుడిగా ట్రంప్ విజయంతో అమెరికా ఆర్థిక వ్యవస్థ నిలదొక్కుకోవడం, వడ్డీ రేట్ల పెంపు అంచనాలు వంటివి డాలర్‌ను 13 ఏళ్ల గరిష్ట స్థాయికి వెళ్లేలా చేశాయి. అంతర్జాతీయ కరెన్సీలు డాలర్‌తో పోలిస్తే మరింత బలహీనతను నమోదుచేస్తున్నాయి. మరోవైపుదేశీయ మార్కెట్లు, బంగారం, వెండి ధరలు కూడా గ‌త కొద్ది రోజులుగా త‌గ్గుముఖం ప‌డుతున్న సంగ‌తి తెలిసిందే. ఈ రోజు ఒక ద‌శ‌లో రూపాయి రికార్డు స్థాయి క‌నిష్ట‌మైన 68.86కు సైతం చేరి మ‌ళ్లీ తిరిగి నెమ్మ‌దిగా కోలుకొంటోంది.