దేశ‌వ్యాప్తంగా రూ. 1000, రూ. 500 నోట్లు ర‌ద్దు జ‌రిగాక ప్ర‌జ‌లంతా బ్యాంక‌ర్ల‌కు ఊపిరి స‌ల‌ప‌కుండా డిపాజిట్లు చేసేందుకు క్యూ క‌డుతున్నారు. అయితే ఇంత మంది డిపాజిట్లు వ‌రుస‌గా చేస్తుంటే బ్యాంకుల వ‌ద్ద ఎంత డబ్బు జ‌మ అయిందోన‌ని అంద‌రికీ ఆస‌క్తి ఉంటుంది. పాతనోట్ల రద్దు ప్రకటన వెలువడినప్పటి నుంచి దేశవ్యాప్తంగా బ్యాంకుల్లో జరిగిన డిపాజిట్లు, నగదు మార్పిడి వ్యవహారాలపై రిజర్వ్‌బ్యాంక్‌ నివేదిక వెలువరించింది. దేశవ్యాప్తంగా నవంబ‌రు 10 నుంచి న‌వంబ‌రు 18 మధ్య బ్యాంకుల్లో రూ.5,44,571 కోట్లు డిపాజిట్‌ అయినట్లు ఆర్‌బీఐ ప్రకటించింది. దీనిలో రూ.5,11,565 కోట్లు బ్యాంకు ఖాతాల్లో జమ చేయగా.. రూ.33,006 కోట్లు నగదును మార్చుకున్నారు. ఏటీఎంలు, బ్యాంకుల నుంచి రూ.1,03,316 కోట్ల రూపాయ‌ల డ‌బ్బును ప్ర‌జలు తీసుకున్నారు.