అమెరికన్‌ మ్యాగజైన్‌ ఫార్చ్యూన్‌ టాప్‌ 50 వ్యాపార వ్య‌క్తుల‌ జాబితాలో హెచ్‌డీఎఫ్‌సీ బ్యాంకు మేనేజింగ్‌ డైరెక్టర్‌ ఆదిత్య పూరికి చోటు దక్కింది. 2016 సంవత్సరానికి సంబంధించి మ్యాగజైన్‌ టాప్‌ 50 వ్యాపార వ్య‌క్తుల జాబితాను విడుదల చేయగా, ఆదిత్య పూరీ 36వ స్థానంలో నిలిచారు. భారతీయ సంతతికి చెందిన ముగ్గురు ఈ జాబితాలో ఎంపిక కాగా, ఆదిత్య పూరి ఒక్కరే భారతదేశానికి చెందిన వారు కావ‌డం గ‌మ‌నార్హం.

దేశంలో రెండో అతిపెద్ద ప్రైవేటు బ్యాంకు అయిన హెచ్‌డీఎఫ్‌సీకి 1994 నుంచి ఆదిత్య పూరి మేనేజింగ్‌ డైరెక్టర్‌గా ఉన్నారు. ఫేస్‌బుక్‌ సహ వ్యవస్థాపకుడు మార్క్‌ జుకర్‌బర్గ్ నంబ‌ర్‌వ‌న్ కాగా, మైక్రోసాఫ్ట్‌ చీఫ్‌ సత్యనాదెళ్ల 5వ‌ స్థానంలో నిలిచారు. ఏవో(AO Simith's) స్మిత్స్‌ అజిత్‌ రాజేంద్ర 34, మాస్టర్‌కార్డ్స్‌ అజయ్‌ భంగా 40వ స్థానాల్లో ఉన్నారు.
పూరి నేతృత్వంలోని హెచ్‌డీఎఫ్‌సీ బ్యాంకు గతేడాది 1.9 బిలియన్‌ డాలర్ల లాభంతో ఉందని ఫార్చ్యూన్ మ్యాగజైన్‌ వెల్లడించింది. దేశంలో అత్యధిక వేతనం తీసుకుంటున్న బ్యాంకర్లలో 66 ఏళ్ల ఆదిత్య పూరి ఒకరు. ఈ ఏడాది ఆరంభంలో ఆయ‌న‌ గుండె శ‌స్త్ర‌చికిత్స చేయించుకున్నారు.