'బీబీసీ వరల్డ్‌ వైడ్‌ సర్వీస్‌' తెలుగు భాషకూ విస్తరిస్తోంది. బీబీసీ తన సేవలను కొత్తగా 11 భాషల్లో ప్రారంభించనుంది. ఇందులో భారతీయ భాషలు తెలుగు, గుజరాతీ, మరాఠీ, పంజాబీ కూడా ఉన్నాయి. ఈ భాషల్లో బీబీసీ.. రేడియో, మొబైల్‌, వీడియో కంటెంట్‌ను అందించనుంది. ఇందు కోసం భారతదేశంలో 157 ఉద్యోగాలను సృష్టించనుంది. ప్రస్తుతం భారత్‌లో తమిళం, హిందీ, బెంగాలీ భాషల్లో బీబీసీ వెబ్‌సైట్లున్నాయి. కొత్త భాషల ప్ర‌సారాల‌ను వచ్చే ఏడాది ప్రారంభించనున్నట్లు బీబీసీ ఒక ప్రకటనలో వెల్లడించింది. బీబీసీ సంస్థ‌కు బ్రిటన్‌ తర్వాత అత్యధిక ఉద్యోగులున్న కేంద్రం ఢిల్లీయే అవుతుందని తెలిపింది. ప్రస్తుతం 29 భాషల్లో బీబీసీ ఉంది. 2022 అంటే బీబీసీ శతాబ్ది వేడుకలకల్లా.. ప్రపంచ వ్యాప్తంగా 50 కోట్ల మంది వీక్షకులను సాధించాలని లక్ష్యంగా పెట్టుకుంది. ప్రస్తుతం బీబీసీకి 34.8 కోట్ల మంది వీక్షకులున్నారు.