పెద్దనోట్ల రద్దుపై స్టే ఇచ్చేందుకు సుప్రీంకోర్టు నిరాకరించింది. పెద్దనోట్ల రద్దును సవాల్‌ చేస్తూ దాఖలైన పిటిషన్‌పై అత్యున్నత న్యాయస్థానం మంగళవారం విచారణ చేపట్టింది. దీనిపై స్టే ఇచ్చేందుకు నిరాకరిస్తూనే.. ప్రభుత్వానికి పలు సూచనలు చేసింది. నగదు మార్పిడి, ఉపసంహరణకు ప్రజలు ఇబ్బందులు పడకుండా చర్యలు తీసుకోవాలని ప్ర‌భుత్వానికి స‌ల‌హా ఇచ్చింది.

నగదు ఉపసంహరణ పరిమితిని పెంచితే ఏం జ‌రుగుతుందని కేంద్రాన్ని ప్రశ్నించింది. బ్యాంకులు, ఏటీఎంల వద్ద రద్దీ నియంత్రణకు తీసుకున్న చర్యలపై నివేదిక సమర్పించాలని కేంద్రాన్ని ఆదేశించింది. తదుపరి విచారణను నవంబరు 25 నాటికి వాయిదా వేసింది.
నల్లధనం లాంటి పెద్ద సమస్యపై పోరాటం జరుపుతున్నప్పుడు స్వ‌ల్ప‌ ఇబ్బందులు తలెత్తడం సహజమన్న అటార్నీ జనరల్‌ అభిప్రాయంతో కోర్టు ఏకీభవించింది. పౌరులకు ఇబ్బందులు కలగకుండా తీసుకున్న చర్యలను పేర్కొంటూ అఫిడవిట్‌ దాఖలు చేయాల్సిందిగా కేంద్ర ప్రభుత్వాన్ని కోరింది.