మీ ఆదాయానికి, మీ ద‌గ్గ‌ర ఉన్న డ‌బ్బుకు తేడా ఉందా? అలా ఉండి దాన్ని బ్యాంకులో డిపాజిట్ చేయాలంటే క‌ష్ట‌మే. అందుకు పెనాల్టీ ఉంటుంద‌ని ప్ర‌భుత్వ వ‌ర్గాలు పేర్కొంటున్నాయి. ఇకపై బ్యాంకులో రూ.2.5లక్షల డిపాజిట్‌ దాటితే పాన్‌కార్డుతో సహా ఆదాయ మార్గాల వివరాలను సమర్పించాల్సి ఉంటుంది. లేనిపక్షంలో భారీ మొత్తంలో జరిమానా విధించడానికి ప్రభుత్వం సిద్ధమైంది. అక్రమ సంపాదన అని తేలితే 200 శాతం వరకు జరిమానా విధించే అవకాశం ఉన్నట్లు సమాచారం.

50 రోజుల్లో డిపాజిట్లకు సంబంధించిన సమగ్ర నివేదికను ఆధారం చేసుకొని రూ. 2.5లక్షలకుపైగా జమచేసే ప్రతి ఖాతాదారుడి వివరణ తీసుకోనున్నట్లు కేంద్ర రెవెన్యూ కార్యదర్శి హష్మఖ్‌ ఆధియా తెలిపారు. బంగారు ఆభరణాల కొనుగోలుదారుల నుంచి పాన్‌కార్డు వివరాలను తీసుకోవాల్సిన బాధ్యత జ్యువెలరీ యజమానులదేనని స్పష్టం చేశారు. లేనిపక్షంలో వారిపై చర్యలు తప్పవని హెచ్చరించారు. ఆదాయ పన్ను పరిధిలోకి వచ్చే వారు సరైన రిటర్న్స్‌ దాఖలు చేస్తున్నారో లేదో ఐటీ శాఖ‌ అధికారులు క‌నిపెడ‌తార‌ని అధియా వెల్ల‌డించారు. చిన్న వ్యాపారులు, గృహిణులు, చిరుద్యోగులు.. పన్ను పరిధిలోకి రాని వారు దాచుకునే మొత్తాల గురించి ఎటువంటి ఆందోళన అక్కర్లేదన్నారు. రూ.2లక్షల్లోపు మొత్తాలను జమ చేసేవారిపై ఆదాయపన్ను శాఖ నుంచి ఎటువంటి ఇబ్బందులు రావని భరోసా ఇచ్చారు.