ఆర్థిక సంవత్సరం మొదటి అర్ధ భాగంలో గతంతో పోలిస్తే విదేశీ ప్రత్యక్ష పెట్టుబడులు(ఎఫ్‌డీఐ) 30 శాతం మేరకు పెరిగినట్లు అధికారులు వెల్లడించారు. ఏప్రిల్‌-సెప్టెంబరు 2015-16 ఆర్థిక సంవత్సరంలో 16.63 బిలియన్‌ డాలర్లుగా ఉన్న పెట్టుబడులు ప్రస్తుత ఆర్థిక సంవత్సరం మొదటి భాగంలో 21.62 బిలియన్‌ డాలర్లుగా నమోదైనట్లు అధికార వర్గాలు పేర్కొన్నాయి. వ్యాపార నిర్వహణకు సంబంధించి ప్రభుత్వం చేపట్టిన సంస్కరణలు, ఎఫ్‌డీఐల నిబంధనల్లో మార్పులు తీసుకురావడంతో పెట్టుబడుల ఆకర్షణకు కారణమని తెలుస్తుంది. నిర్మాణ, పౌర విమానయాన రంగాల్లో పెట్టుబడులు ఎక్కువగా వచ్చినట్లు తెలిపారు. సింగపూర్‌, నెదర్లాండ్స్‌, జపాన్‌ తదితర దేశాల నుంచి భారీగా పెట్టుబడులు తరలివచ్చాయి. కంప్యూటర్‌ హార్డ్‌వేర్‌, సాఫ్ట్‌వేర్‌, ఆటోమొబైల్‌ రంగాల్లోకి నిధుల ప్రవాహం అధికంగా ఉన్నట్లు నివేదికలు చెబుతున్నాయి. విదేశీ ప్రత్యక్ష పెట్టుబడులు ఎక్కువగా రావడం వల్ల దేశాభివృద్ధి వేగవంతం కానుందని ఆశాభావం వ్యక్తం చేశారు.