ప్రభుత్వరంగ బ్యాంకు సెంట్రల్‌ బ్యాంక్‌ ఆఫ్‌ ఇండియా లాభాలకు మొండి బకాయిలు(నిర‌ర్ద‌క ఆస్తులు) గండి కొట్టాయి. సెప్టెంబ‌రుతో ముగిసిన‌ రెండో త్రైమాసికంలో కేటాయింపులు భారీగా పెరగడంతో రూ.641.80 కోట్ల నికర నష్టాన్ని చవి చూసింది. నిరర్థక ఆస్తులు (ఎన్‌పీఏ) రెట్టింపు కావడంతో కేటాయింపులు రూ.654.44 కోట్ల నుంచి రూ.1661.21 కోట్లకు పెరిగాయి. గత ఆర్థిక సంవత్సరం జులై-సెప్టెంబరు త్రైమాసికంలో బ్యాంకుకు రూ.112.80 కోట్ల లాభం రావడం గమనించదగిన విషయం. సమీక్షిస్తున్న త్రైమాసికంలో బ్యాంకు ఆదాయం రూ.7,104.10 కోట్ల నుంచి రూ.6,965.40 కోట్లకు తగ్గింది. ఎన్‌పీఏల విషయానికి వస్తే స్థూల ఎన్‌పీఏలు 6.56 శాతం నుంచి 13.70 శాతానికి, నికర ఎన్‌పీఏలు 3.83 శాతం నుంచి 8.17 శాతానికి పెరిగాయి.