అక్టోబరు 21తో ముగిసిన వారానికి విదేశీ మారక నిల్వలు బిలియన్‌ డాలర్లు పెరిగి 367.14 బిలియన్‌ డాలర్ల (సుమారు రూ.24.60 లక్షల కోట్లు)కు చేరాయని ఆర్‌బీఐ వెల్ల‌డించింది. ప్రధాన కరెన్సీ ఆస్తులు పెరగడమే ఇందుకు కారణం. విదేశీ కరెన్సీ ఆస్తులు (ఎఫ్‌సీఏ) 1.015 బిలియన్‌ డాలర్లు అధికమై 341.923 బిలియన్‌ డాలర్లకు చేరాయి. అయితే గతవారంతో పోలిస్తే మొత్తం ఆస్తులు 1.506 బిలియన్‌ డాలర్లు తగ్గి, 366.139 బిలియన్‌ డాలర్లకు చేరాయి. సెప్టెంబరుతో 30తో ముగిసిన వారంలో మొత్తం ఆస్తులు జీవితకాల గరిష్ఠస్థాయి 371.99 బిలియన్‌ డాలర్లకు చేరిన సంగతి విదితమే. బంగారం నిల్వలు మాత్రం స్థిరంగా 21.406 బిలియన్‌ డాలర్లుగానే ఉన్నాయి. అంతర్జాతీయ ద్రవ్య నిధి (ఐఎంఎఫ్‌) వద్ద ప్రత్యేక ఉపసంహరణ హక్కులు మాత్రం 5.4 మిలియన్‌ డాలర్లు తగ్గి 1.463 బిలియన్‌ డాలర్లకు చేరాయి.