నష్టాల్లో వూబిలో కూరుకుపోయిన ట్విట్ట‌ర్‌.. ఇప్పుడు ఖర్చులను తగ్గించుకునే పనిలో పడింది. ఇందులో భాగంగా ప్రపంచవ్యాప్తంగా ప‌లు చోట్ల కొన్ని ఉద్యోగాలకు కోత విధించనుంది. దాదాపు 300 మంది ఉద్యోగులను తొలగించేందుకు ట్విటర్‌ ప్రయత్నిస్తున్నట్లు తెలుస్తోంది. మరో రెండు మూడు రోజుల్లో దీనిపై అధికారిక ప్రకటన వెలువడే అవకాశం ఉంది. గురువారం ఆ సంస్థ మూడో త్రైమాసిక ఫలితాలు విడుదల కానున్నాయి. దీని కంటే ముందే ఉద్యోగులను తొలగించే విషయంలో నిర్ణయం తీసుకోనున్నట్లు విశ్వసనీయ వర్గాల సమాచారం. గత కొంతకాలంగా ట్విటర్‌ ఆర్థిక ఇబ్బందులు ఎదుర్కొంటున్న విష‌యం విదిత‌మే. అంతేగాక, గత 12 నెలల్లో ట్విటర్‌ షేర్‌ ధరలు 40శాతం వరకు పడిపోయాయి. దీంతో కంపెనీ నష్టాల్లో కూరుకుపోవడంతో అమ్మకానికి సైతం సిద్ధపడింది. అయితే ఇందుకోసం వాల్ట్‌ డిస్నీ, గూగుల్‌, సేల్స్‌ఫోర్స్‌ లాంటి సంస్థలు బిడ్డింగ్‌పై ఆసక్తి చూపించినప్పటికీ.. చివరి నిమిషంలో కొనుగోలు చేసేందుకు ఎవరూ ముందుకు రాకపోవడం గమనార్హం.