ఎయిర్‌టెల్, వోడాఫోన్, ఐడియాల కొత్త వినియోగ‌దారుల సంఖ్య ఆగ‌స్టులో 20.9ల‌క్ష‌ల మేర పెర‌గ‌డంతో మొత్తం జీఎస్ఎం మొబైల్ వాడ‌కందార్ల సంఖ్య 78.1 కోట్ల‌కు చేరింది. జులైలో 77.9 కోట్ల‌గా ఉన్న ఈ సంఖ్య ఆగ‌స్టులో ఈ మేర‌కు పెరిగింద‌ని సెల్యూలార్ ఆప‌రేట‌ర్ అసోషియేష‌న్ ఆఫ్ ఇండియా(సీవోఏఐ) తెలిపింది.

సీవోఏఐ స‌మాచారం ప్ర‌కారం భార‌తి ఎయిర్‌టెల్ వినియోగ‌దార్ల సంఖ్య 25.7 కోట్లుగా ఉండ‌గా; వోడాఫోన్ వాడే వారి సంఖ్య 20 కోట్లుగా, ఐడియా క‌స్ట‌మ‌ర్ల సంఖ్య 17.7 కోట్లుగా ఉంది. మొత్తం అన్ని నెట్‌వ‌ర్క్‌ల్లో జ‌త‌యిన కొత్త‌వారిలో ఆగ‌స్టు నెల‌లో ఎయిర్‌టెల్ 33 శాతం వినియోగదార్లను సంపాదించింది. సీవోఏఐ లెక్కించిన వినియోగదార్ల మొత్తంలో జియో వాడ‌కందార్ల‌ను లెక్కించ‌లేదు. ఎందుకంటే ముకేశ్ అంబానీ అధికారికంగా సెప్టెంబ‌రు5నే రిల‌య‌న్స్ జియో గురించి ప్ర‌క‌టించారు.

7.15 కోట్ల‌తో ఉత్త‌ర‌ప్ర‌దేశ్(తూర్పు) స‌ర్కిల్ మొత్తం వినియోగదారుల సంఖ్య‌లో మొద‌టి స్థానంలో ఉంది. మ‌హారాష్ట్ర రెండో స్థానంలో ఉండ‌గా బీహార్ మూడో స్థానంలో ఉంది. ఈ మూడు స‌ర్కిళ్లు క‌లిపి 20.491 కోట్ల వినియోగ‌దారులున్నారు.