ప్ర‌పంచంలోనే అతిపెద్ద సౌర విద్యుత్ ప్లాంటును త‌మిళ‌నాడులో అదానీ గ్రీన్ ఎన‌ర్జీ ఏర్పాటు చేసింది. ప్లాంటు విద్యుత్ ఉత్పాద‌న సామ‌ర్థ్యం 648 మెగావాట్లని కంపెనీ అధికారిక ప్ర‌క‌ట‌న‌లో వెల్ల‌డించింది. త‌మిళ‌నాడులోని రామ‌నాథ‌పురం వ‌ద్ద క‌ముతిలో ఈ ప్లాంటు ఉంది. ఈ ప్లాంటు ఏర్పాటు కోసం దాదాపు రూ. 4550 కోట్ల పెట్టుబ‌డి పెట్టారు. రాష్ట్ర ప్రభుత్వ లక్ష్యమైన 3000 మెగావాట్ల ఉత్పత్తిలో ఇది కూడా భాగ‌మేన‌ని అదానీ గ్రూప్ తెలిపింది. 'తమిళనాడుతో పాటు మొత్తం దేశానికే ఇది ఒక మరపురాని జ్ఞాపకం. దీనిని దేశానికి అంకితం చేయడంపై మేం సంతోషంగా ఉన్నాం. ప్రపంచంలోనే పర్యావరణహిత విద్యుత్‌ తయారీదార్లలో భారత్‌ను ముందుంచడానికి ఈ ప్లాంటు సామర్థ్యం ఉపయోగపడగలద'ని అదానీ గ్రూప్‌ ఛైర్మన్‌ గౌతమ్‌ అదానీ పేర్కొన్నారు. ఈ ప్లాంటును ఏర్పాటు చేయడం కోసం కంపెనీ ప్రపంచవ్యాప్తంగా వివిధ ప్రదేశాల నుంచి సామగ్రిని, యంత్రాలను తెప్పించారు.