మంగ‌ళ‌వారం దేశీయ మార్కెట్లు భారీ లాభాల‌తో ముగిశాయి. ఉద‌యం నుంచే లాభాల్లో కొన‌సాగిన సెన్సెక్స్ ఒక ద‌శ‌లో 29 వేల స్థాయిని దాటేసింది. నిప్టీ సైతం 18 నెల‌ల గ‌రిష్టానికి వెళ్లింది. మార్కెట్ ముగిసే స‌మ‌యానికి సెన్సెక్స్ 446 పాయింట్ల లాభంతో 28,978 వ‌ద్ద ముగిసింది. నిఫ్టీ 133 పాయింట్లు పైకి ఎగ‌సి 8943 పాయింట్ల వ‌ద్ద క్లోజ‌యింది. ఒక ప‌క్క ఫెడ‌ర‌ల్ రిజ‌ర్వ్ రేట్లు పెంచాల‌నుకుంటున్న త‌రుణంలో యూఎస్ పేరొల్స్ డేటా నిరాశ‌ప‌ర‌చ‌డం భార‌త మార్కెట్ల సెంటిమెంటుకు సానుకూలాంశ‌మ‌యింది. దీంతో పాటు ఫెడ్ రేట్ల‌పై సీఎంఈ గ్రూప్ నిర్వ‌హించిన ఫెడ్ వాచ్ గ్రూప్ ఫెడ్ రేట్ల పెంపు 24%కాకుండా 21 శాతంగా ఉండ‌గ‌ల‌ద‌ని గురువాం రోజు చెప్పిన వార్త‌తో ఆసియా మార్కెట్లు లాభ‌ప‌డ్డాయి.

బీఎస్ఈలో అన్ని రంగాలు లాభాల బాట ప‌ట్టాయి. బ్యాంకింగ్ రంగం అత్య‌ధికంగా 2.96% లాభ‌ప‌డ‌గా, వినియోగ‌దారు వ‌స్తువుల(క‌న్సూమ‌ర్ డ్యూర‌బుల్స్‌) సూచీ 2.94%, ఆటో రంగం 2.83%, విద్యుత్ (ప‌వ‌ర్‌) రంగం 1.39% పైకి ఎగిశాయి. సెన్సెక్స్‌లో బాగా లాభ‌ప‌డిన వాటిలో టాటామోటార్స్‌(7.19%), యాక్సిస్ బ్యాంకు(6.14%), ఐసీఐసీఐ బ్యాంకు(4.25%), టాటా స్టీల్‌(3.25%) ఉన్నాయి. న‌ష్ట‌పోయిన వాటిలో టీసీఎస్‌(1.17%), కోల్ ఇండియా(1.11%), విప్రో(0.11%), ఐటీసీ(0.04%) ఉన్నాయి.
డాల‌రుతో రూపాయి విలువ 66.52గా కొన‌సాగుతోంది.