బ్యాంకుల‌కు వేల కోట్లు బకాయి పడిన పారిశ్రామికవేత్త విజయ్‌మాల్యాపై చర్యలు మొదలయ్యాయి. తాజాగా మాల్యాకు చెందిన రూ.6,630 కోట్ల ఆస్తులను ఎన్‌ఫోర్స్‌మెంట్‌ డైరెక్టరేట్‌ (ఈడీ) అటాచ్‌ చేసింది. ముంబయి, బెంగళూరు సహా ఇతర ప్రాంతాల్లోని ఆయన అస్తులను ఈడీ అటాచ్ చేసిన‌ట్లు వెల్ల‌డించింది. 2010లో వీటి విలువ ఆధారంగా జప్తు చేసినట్లు ఈడీ తెలిపింది. ప్రస్తుత ధరల ప్రకారం వీటి విలువ మార్కెట్‌ ఆధారంగా దాదాపు రూ.6,600 కోట్లు ఉంటుందని అంచనా. దీంతో మొత్తం అటాచ్ చేసిన ఆస్తుల విలువ రూ. 8044 కోట్ల‌కు చేరింది.

ఈడీ అటాచ్‌ చేసిన ఆస్తుల్లో మహారాష్ట్రలో ఉన్న మాల్యా ఫామ్‌ హౌస్‌ ఉంది. దీని విలువ సుమారు రూ.200 కోట్లు అని భావిస్తున్నారు. బెంగళూరులో కింగ్‌ఫిష‌ర్ ట‌వ‌ర్‌లోని ఫ్లాట్లు ఉన్నాయి. యూబీఎల్‌, యూఎస్‌ఎల్‌లోని రూ.3000 కోట్లు విలువైన వాటాలు ఉన్నాయి. బ్యాంకుల అప్పులు ఎగవేసేవారికి బలమైన సందేశం పంపేలా చర్యలు తీసుకోవాలని, అప్పులు ఎగ్గొట్టే వారిపై చర్యలు తీసుకోవాలని ప్రభుత్వం తీసుకున్న నిర్ణయానికి అనుగుణంగా ఈ చర్యలు తీసుకున్నట్లు సమాచారం.