సిట్ ప్ర‌తిపాదించిన విధంగా రూ. 3 ల‌క్ష‌ల‌కు పైబ‌డి జ‌రిగే న‌గ‌దు లావాదేవీల‌ను క్ర‌మ‌బ‌ద్దీక‌రించేందుకు ప్ర‌భుత్వం యోచిస్తోంది. ఈ మేర‌కు సీబీడీటీ ఛైర్‌ప‌ర్స‌న్ రాణి సింగ్‌ న‌ల్ల‌ధ‌న నియంత్ర‌ణ విష‌యం గురించి చెబుతూ వివ‌రించారు. అక్ర‌మ న‌గదు ప్ర‌వాహాన్ని దేశంలో అరిక‌ట్టేందుకు సుప్రీంకోర్టు నేతృత్వంలో ఏర్పాటైన ప్ర‌త్యేక ద‌ర్యాప్తు బృందం ఈ మేరకు ప్ర‌భుత్వానికి సూచించింది. ప్ర‌త్యేక ద‌ర్యాప్తు బృందం సూచ‌న‌ల‌ను ప‌రిశీలిస్తున్న‌ట్లు సీబీడీటీ ఛైర్‌ప‌ర్స‌న్ అన్నారు. ఈ నిషేధం ద్వారా డెబిట్ లేదా క్రెడిట్ కార్డులు, చెక్కులు, డీడీలను ఉప‌యోగించి చేసే చెల్లింపుల‌ను పెంచే యోచ‌న‌లో ప్ర‌భుత్వం ఉన్న‌ట్లుగా అన‌ధికార వ‌ర్గాల ద్వారా తెలుస్తోంది. త‌ద్వారా న‌ల్ల‌ధ‌న లావాదేవీలు త‌గ్గి అక్ర‌మ న‌గ‌దును క‌ట్ట‌డి చేయొచ్చ‌ని ప్ర‌భుత్వం యోచిస్తున్న‌ట్లుగా ఉంది.